കണ്ണൂര്‍: പരീക്ഷണ ലാന്‍ഡിങിന് എത്തിയ എയര്‍ഇന്ത്യാ എക്‌സ്പ്രസ് വിമാനത്തിനു വിമാനത്താവളത്തില്‍ വന്‍ വരവേല്‍പ്. വിമാനം 11.26നു റണ്‍വേയില്‍ ലാന്‍ഡ് ചെയ്ത് ഏയ്‌റോബ്രിഡ്ജിലേക്കു നീങ്ങുന്നതിനിടെ ഇരുവശത്തും വിമാനത്താവളത്തിലെ ഫയര്‍ എന്‍ജിനുകളുടെ നേതൃത്വത്തില്‍ വാട്ടര്‍ സല്യൂട്ട് നല്‍കി. തുടര്‍ന്നു പുറത്തിറങ്ങിയ ആന്ധ്ര സ്വദേശി കമാന്‍ഡര്‍ ക്യാപ്റ്റന്‍ എ.എസ് റാവു, ഫസ്റ്റ് ഓഫിസര്‍ അരവിന്ദ് കുമാര്‍, തിരുവനന്തപുരം സ്വദേശിനിയായ സീനിയര്‍ കാബിന്‍ ക്രൂ സൈന മോഹന്‍ തുടങ്ങിയവരെ കിയാല്‍ എം.ഡി വി. തുളസീദാസ്, എക്‌സിക്യൂട്ടീവ് ഡയറക്ടര്‍ കെ.പി ജോസ്, ചീഫ് പ്രോജക്ട് എന്‍ജി നിയര്‍ ഇന്‍ചാര്‍ജ് കെ.എസ് ഷിബുകുമാര്‍ എന്നിവരുടെ നേതൃത്വത്തില്‍ സ്വീകരിച്ചു. മട്ടന്നൂര്‍ നഗരസഭാ വൈസ് ചെയര്‍മാന്‍ പി. പുരുഷോത്തമന്‍, കീഴല്ലൂര്‍ പഞ്ചായത്ത് പ്രസിഡന്റ് എം. രാജന്‍ എന്നിവരും എത്തിയിരുന്നു. വിമാനത്താവളത്തിന്റെ പാസഞ്ചര്‍ ടെര്‍മിനലും പരീക്ഷണ ലാന്‍ഡിങിനെത്തിയ ഉദ്യോഗസ്ഥ സംഘം സന്ദര്‍ശിച്ചു.വിമാനത്താവളത്തില്‍ എത്തിയവരും കരാറുകാരായ എല്‍ ആന്‍ഡ് ടി, കിയാല്‍ ജീവനക്കാരും പരീക്ഷണ ലാന്‍ഡിങ് നടത്തിയ വിമാനത്തിനടുത്ത് നിന്നു സെല്‍ഫി എടുക്കാന്‍ തിരക്കുകൂട്ടി. ലാന്‍ഡിങ് കാഴ്ചകള്‍ പലരും സമൂഹമാധ്യമങ്ങളിലൂടെ തത്സമയം നല്‍കുന്നുണ്ടായിരുന്നു.