കരുളായി: പ്രളയത്തെ തുടര്‍ന്ന് സംസ്ഥാനത്തിന്റെ വിവിധ ഭാഗങ്ങളിലെ ടൂറിസം കേന്ദ്രങ്ങള്‍ തകര്‍ന്നടിഞ്ഞതോടെ മേഖലയിലെ ടൂറിസ്റ്റ് ടാക്‌സി സര്‍വിസ് പ്രതിസന്ധിയിലായി.
ഇതോടെ ടൂറിസ്റ്റ് ബസുകളും ചെറുകിട വാഹനങ്ങളും സ്റ്റോപ്പ് മെമ്മോ നല്‍കാന്‍ ഒരുങ്ങുകയാണ്. പ്രളയത്തെ തുടര്‍ന്ന് യാത്രക്കാര്‍ കുറഞ്ഞതാണ് ടൂറിസ്റ്റ് ടാക്‌സി സര്‍വിസുകള്‍ പ്രതിസന്ധിയിലാകാന്‍ കാരണം. മികച്ച ഓട്ടം ലഭിക്കുന്ന സീസണായിട്ടും ടാക്‌സി വാഹനങ്ങള്‍ക്ക് ഓട്ടമില്ലാത്ത സ്ഥിതിയാണ്. പ്രധാന ടൗണുകളില്‍നിന്നു പോലും വാഹനങ്ങള്‍ ഓട്ടം പോയിട്ട് മാസങ്ങളായതായി ഡ്രൈവര്‍മാര്‍ പറയുന്നു.
സ്‌കൂളുകളും ഓഫിസുകളും കേന്ദ്രീകരിച്ച് വിനോദയാത്രാ ട്രിപ്പുകളുടെ സമയമായിട്ടും മിക്ക ടാക്‌സികള്‍ക്കും ട്രിപ്പുകളൊന്നുമായിട്ടില്ല. ഭൂരിഭാഗം വിദ്യാലയങ്ങളില്‍നിന്നും ഈ വര്‍ഷം വിനോദ യാത്രകള്‍ ഒഴിവാക്കിയിട്ടു@്.
ടൂറിസ്റ്റ് ബസുകളെല്ലാം നികുതി അടക്കാതെ സ്റ്റോപ്പ് മെമ്മോ നല്‍കി നിര്‍ത്തിയിട്ടിരിക്കുകയാണ്. ഇതോടെ ടൂറിസ്റ്റ് ബസുകളില്‍ തൊഴിലെടുക്കുന്ന നിരവധി പേരാണ് ദുരിതത്തിലായത്. ലോണെടുത്തും മറ്റും ബസുകള്‍ വാങ്ങി സര്‍വിസ് നടത്തുന്നവരും വെട്ടിലായി.