കുന്നമ്പറ്റ: കുന്നമ്പറ്റയിലെ ജനവാസ കേന്ദ്രത്തില്‍ ഇറങ്ങിയ കാട്ടാനകള്‍ വന്‍തോതില്‍ കൃഷി നശിപ്പിച്ചു. എല്‍.പി സ്‌കൂളിന് സമീപമാണ് ആന ഇറങ്ങിയത്. കുന്നമ്പറ്റ കൃഷ്ണാലയത്തില്‍ രാമകൃഷ്ണന്‍, ഷരീഫ്, നാസര്‍, അഷ്‌റഫ് എന്നി കര്‍ഷകരുടെ കൃഷിയാണ് നശിപ്പിച്ചത്.
500ലേറെ കുലച്ച വാഴകളും ആറ് വലിയ തെങ്ങുകളുമാണ് നശിപ്പിച്ചത്. കഴിഞ്ഞ ദിവസം രാത്രിയായിരുന്നു സംഭവം. കനത്ത മഴയായതിനാല്‍ ആനകള്‍ എത്തിയത് നാട്ടുകാര്‍ അറിഞ്ഞില്ല.
കഴിഞ്ഞ ഒരു വര്‍ഷത്തിനിടെ പല തവണയാണ് പ്രദേശത്ത് ആന ഇറങ്ങിയത്. പ്രദേശത്തെ സ്വകാര്യ എസ്‌റ്റേറ്റില്‍ തമ്പടിക്കുന്ന ആനകള്‍ നേരം ഇരുട്ടുമ്പോഴാണ് ജനവാസ കേന്ദ്രത്തില്‍ ഇറങ്ങുന്നത്. വന്യമൃഗ ശല്യത്തിനെതിരെ നാട്ടുകാര്‍ ഫോറസ്റ്റ് റെയ്ഞ്ച് ഓഫിസ് മാര്‍ച്ചടക്കം നടത്തിയിരുന്നു. എന്നിട്ടും പ്രശ്‌നത്തിന് പരിഹാരം കണാത്തതിനാല്‍ റോഡ് ഉപരോധം നടത്താനുള്ള ഒരുക്കത്തിലാണ് നാട്ടുകാര്‍.