ശ്രീകൃഷ്ണപുരം : കരിമ്പുഴ ഗ്രാമ പഞ്ചായത്തില്‍ ഡ്രൈവര്‍ നിയമനത്തെചൊല്ലി മുസ്്‌ലിംലീഗും കോണ്‍ഗ്രസും കൊമ്പുകോര്‍ക്കുന്നു. കോണ്‍ഗ്രസ് മുന്നണി മര്യാദ തെറ്റിക്കുകയാണെന്ന് ആരോപിച്ച് യൂത്ത്‌ലീഗും രംഗത്തെത്തി.
കരിമ്പുഴ ഗ്രാമ പഞ്ചായത്തില്‍ ഡ്രൈവര്‍ നിയമനവുമായി ബന്ധപ്പെട്ട് വന്ന പരാതി പരിഹരിക്കാന്‍ ചേര്‍ന്ന ഭരണസമിതി യോഗത്തിലാണ് മുസ്്‌ലിംലീഗിന് എതിരായി കോണ്‍ഗ്രസ് നിലപാട് സ്വീകരിച്ചത്. ഗ്രാമ പഞ്ചായത്തിന്റെ വാഹനത്തില്‍ യൂത്ത് ലീഗ് നേതാവ് റഷീദിനെ ഡ്രൈവറായി രണ്ടര വര്‍ഷം മുമ്പ് നിയമിച്ചിരുന്നു. ഡ്രൈവറെ നിയമാനുസൃതമായല്ല നിയമിച്ചതെന്ന് കാണിച്ചു ജില്ല ഡപ്പ്യൂട്ടി ഡയറക്ടര്‍ക്ക് പരാതി ലഭിച്ചിരുന്നു. ഈ പരാതി പരിഹരിക്കാനാണ് ചൊവ്വാഴ്ച്ച ഭരണ സമിതി യോഗം ചേര്‍ന്നത്.
യോഗത്തില്‍ ഡ്രൈവറെ നിലനിര്‍ത്താന്‍ വേണ്ട നടപടികള്‍ ഉണ്ടാവണമെന്നും, ക്രമക്കേടുണ്ടെങ്കില്‍ പരിഹരിക്കണമെന്നും ലീഗ് നേതാവ് പി.എ തങ്ങള്‍ പറഞ്ഞു. എന്നാല്‍ കോണ്‍ഗ്രസിലെ നാലു പേര്‍ ഡ്രൈവര്‍ നിയമനത്തില്‍ ക്രമക്കേടുണ്ടെന്നും ഡ്രൈവറെ പിരിച്ചു വിടണമെന്നും വാദിച്ചു. തുടര്‍ന്ന് നടന്ന വോട്ടെടുപ്പിലും ലീഗ് നേതൃത്വത്തിന്റെ വാക്കുകള്‍ മുഖവിലക്കെടുക്കാതെ കോണ്‍ഗ്രസ് എതിര്‍ത്ത് വോട്ട് ചെയ്തു.18 അംഗ ഭരണസമിതിയിലെ ലീഗിന്റെ ഏഴു മെമ്പര്‍മാരും, 6 എല്‍.ഡി.എഫ് അംഗങ്ങളും അനുകൂലിച്ച് വോട്ട് ചെയ്തു. ഒരു കോണ്‍ഗ്രസ് മെമ്പര്‍ യോഗത്തിനെത്തിയില്ല. കോണ്‍ഗ്രസ് സെക്രട്ടറിക്ക് ഭിന്നാഭിപ്രായ കുറിപ്പും നല്‍കി. പഞ്ചായത്തിലെ കരാര്‍ നിയമനങ്ങള്‍, ഭരണസമിതിയിലെ നിര്‍ണായക തീരുമാനങ്ങള്‍ എന്നിവയെല്ലാം കോണ്‍ഗ്രസ് പലതവണ മുന്നണി മര്യാദ ലംഘിച്ചിട്ടുണ്ടെന്ന് മുസ്്‌ലിംലീഗ് ആരോപിക്കുന്നു.
യൂത്ത് ലീഗ് നേതാവിന്റെ ഡ്രൈവര്‍ നിയമനത്തില്‍ കാണിച്ച മുന്നണി മര്യാദ ലംഘനത്തില്‍ യൂത്ത് ലീഗ് നേതാക്കള്‍ പ്രതിഷേധിച്ചു. മണ്ഡലം, ജില്ലാ ലീഗ് നേതാക്കളെ പ്രതിഷേധം അറിയിച്ചതായി യൂത്ത് ലീഗ് ഒറ്റപ്പാലം നിയോജകമണ്ഡലം പ്രസിഡന്റ് ഇ.കെ സമദ് മാസ്റ്റര്‍ പറഞ്ഞു.