മൂവാറ്റുപുഴ: കേരള പൊലിസ് അസോസിയേഷന്‍ എറണാകുളം റൂറല്‍ 34- ാമത് ജില്ലാ സമ്മേളനം ഇന്നും നാളെയും മൂവാറ്റുപുഴ കീച്ചേരിപ്പടി കൊച്ചക്കോന്‍ ഓഡിറ്റോറിയത്തില്‍ നടക്കും. ഇന്ന് വൈകിട്ട് മൂന്നിന് യാത്രയയപ്പ് സമ്മേളനവും സെമിനാറും നടക്കും.
സര്‍വീസില്‍ നിന്നും വിരമിക്കുന്നവരെ എല്‍ദോ എബ്രഹാം എം.എല്‍.എ ആദരിക്കും. നഗരസഭാ ചെയര്‍പേഴ്‌സണ്‍ ഉഷ ശശീധരന്‍ മുഖ്യാത്ഥിയായിരിക്കും. തുടര്‍ന്ന് 'കേരള പൊലിസ് 1957ന് ശേഷം' എന്ന വിഷയത്തില്‍ നടക്കുന്ന സെമിനാറില്‍ മുന്‍ എം.പി സെബാസ്റ്റ്യന്‍ പോള്‍ വിഷയാവതരണം നടത്തും.
നാളെ രാവിലെ 10.30ന് നടക്കുന്ന പ്രതിനിധി സമ്മേളനം ജോണ്‍ ഫെര്‍ണാണ്ടസ് എം.എല്‍.എ ഉദ്ഘാടനം ചെയ്യും. ജില്ലാ പൊലിസ് മേധവി എ.വി ജോര്‍ജ് മുഖ്യപ്രഭാഷണം നടത്തും. കെ.പി.എ എറണാകുളം റൂറല്‍ പ്രസിഡന്റ് ബെന്നി കുര്യാക്കോസ് അധ്യക്ഷത വഹിക്കും.
വൈകിട്ട് നാലിന് നടക്കുന്ന പൊതുസമ്മേളനം ആന്റണി ജോണ്‍ എം.എല്‍.എ ഉദ്ഘാടനം ചെയ്യും. മുഖ്യമന്ത്രിയുടെ പൊലിസ് മെഡല്‍ നേടിയവരെ ടെല്‍ക്ക് ചെയര്‍മാന്‍ എന്‍.സി.മോഹനന്‍ ആദരിക്കും. ജില്ലാ ലൈബ്രറി കൗണ്‍സില്‍ പ്രസിഡന്റ് എം.ആര്‍ സുരേന്ദ്രന്‍ മുഖ്യപ്രഭാഷണം നടത്തും. കെ.പി.എ എറണാകുളം റൂറല്‍ പ്രസിഡന്റ് ബെന്നി കുര്യാക്കോസ് അധ്യക്ഷത വഹിക്കും.