പാരിസ്: ഫ്രാന്‍സില്‍ നടക്കുന്ന വനിതാ ഫുട്‌ബോള്‍ ടൂര്‍ണമെന്റില്‍നിന്ന് ബ്രസീല്‍ പുറത്തായി. ഇന്നലെ നടന്ന മത്സരത്തില്‍ ഫ്രാന്‍സിനോട് 2-1 എന്ന സ്‌കോറിന് പരാജയപ്പെട്ടാണ് ബ്രസീല്‍ പുറത്തായത്.
ആദ്യ പകുതിയല്‍ ഗോള്‍ രഹിതമായിരുന്ന മത്സരത്തില്‍ 52-ാം മിനുട്ടില്‍ ഗുവാവിനിലൂടെ ഫ്രാന്‍സ് ലീഡ് നേടി. എന്നാല്‍ ജീവന്‍മരണ പോരാട്ടത്തിനൊടുവില്‍ 63-ാം മിനുട്ടില്‍ ബ്രസീല്‍ താരം തെയ്‌സ ഗോള്‍ തിരിച്ചടിച്ച് സമനില പാലിച്ചു. ഇതോടെ മത്സരം അധിക സമയത്തേക്ക് നീണ്ടു. 106-ാം മിനുട്ടില്‍ അമാന്‍ഡിനെ ഹെന്റിയുടെ ഗോളിലായിരുന്നു ഫ്രാന്‍സിന്റെ ജയം. ഇതോടെ ആതിഥേയരായ ഫ്രാന്‍സ് ക്വാര്‍ട്ടറില്‍ പ്രവേശിച്ചു. മറ്റൊരു മത്സരത്തില്‍ കാമറൂണിനെ എതിരില്ലാത്ത മൂന്ന് ഗോളുകള്‍ക്ക് പരാജയപ്പെടുത്തി ഇംഗ്ലണ്ടും ക്വാര്‍ട്ടര്‍ ഉറപ്പിച്ചു. സ്റ്റെഫ് ഹൗട്ടന്‍ (14), എല്ലിന്‍ വൈറ്റ് (45), അലക്‌സ് ഗ്രീന്‍വുഡ് (58) എന്നിവരാണ് ഇംഗ്ലണ്ടിന് വേണ്ടി ഗോളുകള്‍ നേടിയത്. ക്വാര്‍ട്ടറില്‍ ശക്തരായ നോര്‍വെയാണ് ഇംഗ്ലണ്ടിന്റെ എതിരാളികള്‍. ഇന്ന് രാത്രി 9.30ന് നടക്കുന്ന മത്സരത്തില്‍ ഇറ്റലി ചൈനയേയും രാത്രി 12.30ന് നടക്കുന്ന മത്സരത്തില്‍ നെതര്‍ലന്‍ഡ്‌സ് ജപ്പാനേയും നേരിടും.