ന്യൂഡല്‍ഹി: പ്രധാനമന്ത്രി നരേന്ദ്രമോദി രാജ്യത്തെ ഏറ്റവും നല്ല വില്‍പനക്കാരനാണെന്ന് കോണ്‍ഗ്രസിന്റെ ലോക്‌സഭാ നേതാവ് അധിര്‍ രഞ്ജന്‍ ചൗധരി. ബി.ജെ.പി വീണ്ടും അധികാരത്തില്‍ വരാന്‍ ഇടയാക്കിയത് ആ പാര്‍ട്ടിയുടെ ഉല്‍പന്നങ്ങള്‍ മോദിക്ക് സാമര്‍ഥ്യത്തോടെ വില്‍ക്കാനായതുകൊണ്ടാണെന്നും അദ്ദേഹം പറഞ്ഞു.രാഷ്ട്രപതിയുടെ നയപ്രഖ്യാപന പ്രസംഗത്തിന് നന്ദിപ്രകടിപ്പിച്ചുകൊണ്ട് ലോക്‌സഭയില്‍ സംസാരിക്കുകയായിരുന്നു അധിര്‍ രഞ്ജന്‍ ചൗധരി. ഉല്‍പന്നങ്ങള്‍ വിറ്റഴിക്കുന്നതില്‍ പരാജയപ്പെട്ടതാണ് കോണ്‍ഗ്രസിന് തിരിച്ചടിയായത്. എന്നാല്‍ ബി.ജെ.പിയുടെ വിജയത്തിനു പിന്നില്‍ എന്താണ് വില്‍ക്കുന്നതെന്നോ അതിന്റെ ഗുണമേന്മ എന്താണെന്നോ നോക്കാതെ സമര്‍ഥമായി വിറ്റുവെന്നതാണെന്നും അദ്ദേഹം കൂട്ടിച്ചേര്‍ത്തു.