തൊടുപുഴ: കേരളത്തില്‍ തെക്കുപടിഞ്ഞാറന്‍ കാലവര്‍ഷം ശരാശരിക്ക് മുകളില്‍ ലഭിച്ചെങ്കിലും തുലാമഴയില്‍ 34 ശതമാനം കുറവ്. മലപ്പുറം ജില്ലയിലാണ് വന്‍ മഴക്കുറവ് രേഖപ്പെടുത്തിയിരിക്കുന്നത് (64 ശതമാനം). കാസര്‍കോട്, കണ്ണൂര്‍ ജില്ലകളില്‍ മാത്രമാണ് സാധാരണ മഴ ലഭിച്ചിരിക്കുന്നത്. മറ്റ് ജില്ലകളിലെല്ലാം മഴക്കുറവുണ്ട്.
കേന്ദ്ര അന്തരീക്ഷ ശാസ്ത്ര കേന്ദ്ര (ഐ.എം.ഡി) ത്തിന്റെ കണക്കുപ്രകാരം ഒക്ടോബര്‍ ഒന്നു മുതല്‍ ഇന്നലെവരെ ലഭിച്ചത് 270.02 മി.മീ മഴയാണ്. 407.02 മി.മീ ആണ് ഇക്കാലയളവില്‍ ലഭിക്കേണ്ട ശരാശരി മഴ. മറ്റ് ജില്ലകളിലെ മഴക്കുറവ് ശതമാനത്തില്‍ ഇങ്ങനെയാണ്. തിരുവനന്തപുരം 43, കൊല്ലം 41, ആലപ്പുഴ 41, എറണാകുളം 28, ഇടുക്കി 20, കോട്ടയം 27, പത്തനംതിട്ട 37, തൃശൂര്‍ 46, വയനാട് 29, പാലക്കാട് 46, കോഴിക്കോട് 22 ശതമാനം. സെപ്റ്റംബര്‍ മാസത്തില്‍ റെക്കോര്‍ഡ് മഴയാണ് സംസ്ഥാനത്ത് ലഭിച്ചത്.
മഴക്കുറവ് അണക്കെട്ടുകളിലേക്കുള്ള നീരൊഴുക്കിനെ സാരമായി ബാധിച്ചിട്ടുണ്ട്. നവംബര്‍ ഒന്നിന് 3,640.035 ദശലക്ഷം യൂനിറ്റ് വൈദ്യുതി ഉല്‍പാദിപ്പിക്കാനുള്ള വെള്ളം എല്ലാ അണക്കെട്ടുകളിലുമായി ഉണ്ടായിരുന്നു. സംഭരണശേഷിയുടെ 88 ശതമാനമായിരുന്നു ഇത്. ഇന്നലെ രാവിലത്തെ കണക്കുപ്രകാരം 3,597.427 ദശലക്ഷം യൂനിറ്റ് വൈദ്യുതിക്കുള്ള വെള്ളമാണുള്ളത്. ഇത് സംഭരണശേഷിയുടെ 87 ശതമാനമാണ്. നവംബര്‍ ഒന്നുമുതല്‍ ഇന്നലെ വരെ 212 ദശലക്ഷം യൂനിറ്റ് വൈദ്യുതിക്കുള്ള നീരൊഴുക്കാണ് അണക്കെട്ടുകളിലേക്ക് വൈദ്യുതി ബോര്‍ഡ് പ്രതീക്ഷിച്ചിരുന്നത്.
എന്നാല്‍ 214.67 ദശലക്ഷം യൂനിറ്റിനുള്ള വെള്ളം ഒഴുകിയെത്തി. ഏറ്റവും വലിയ സംഭരണിയായ ഇടുക്കിയില്‍ സംഭരണശേഷിയുടെ 89 ശതമാനം വെള്ളം നിലവിലുണ്ട്. മഴക്കുറവിനുപിന്നാലെ സംസ്ഥാനത്ത് ചൂട് ഉയരുകയാണ്. ഇതോടൊപ്പം വൈദ്യുതി ഉപഭോഗവും ഉയരുന്നുണ്ട്.