മനാമ: സഊദിയുടെ ദേശീയ ദിനത്തില്‍ ഭരണാധികാരികള്‍ക്കും ജനതക്കും ബഹ്റൈന്‍ ഭരണാധികാരികള്‍ ആശംസകള്‍ നേര്‍ന്നു.  ബഹ്റൈന്‍ രാജാവ് ഹമദ് ബിന്‍ ഈസ ആല്‍ ഖലീഫ, പ്രധാനമന്ത്രി പ്രിന്‍സ് ഖലീഫ

ബിന്‍ സല്‍മാന്‍ ആല്‍ ഖലീഫ, കിരീടാവകാശിയും ഒന്നാം ഉപപ്രധാനമന്ത്രിയുമായ പ്രിന്‍സ് സല്‍മാന്‍ ബിന്‍ ഹമദ് ആല്‍ ഖലീഫ എന്നിവരാണ് ആശംസാ സന്ദേശങ്ങള്‍ അയച്ചത്. 

 

സൗദി ഭരണാധികാരി സല്‍മാന്‍ ബിന്‍ അബ്ദുല്‍ അസീസ് ആല്‍ സുഊദ് രാജാവിന് രാജ്യത്തെ കൂടുതല്‍ ഉയരങ്ങളിൽ എത്തിക്കാന്‍ സാധിക്കുമെന്നാണ് പ്രതീക്ഷിക്കുന്നതെന്ന് രാഷ്ട്ര നേതാക്കള്‍ സന്ദേശത്തില്‍ പറഞ്ഞു.

 

ബഹ്റൈന് ഒപ്പം നിന്ന് സഹായങ്ങള്‍ നല്‍കുന്ന സഊദിയുടെ ദേശീയ ദിനം തങ്ങളുടെ കൂടി ദേശീയ ദിനമാണെന്ന് വ്യക്തമാക്കിയ നേതാക്കള്‍ സഊദി രാജാവിന് ആരോഗ്യവും ദീര്‍ഘായുസ്സും നേരുകയും ചെയ്തു. 

സൗദിയിലെ ബഹ്റൈന്‍ അംബാസഡര്‍ ശൈഖ് ഹമൂദ് ബിന്‍ അബ്ദുല്ല ആല്‍ ഖലീഫ, ശൂറ കൗണ്‍സില്‍ അധ്യക്ഷന്‍ അലി ബിന്‍ സാലി അസ്സാലിഹ് എന്നിവരും ആശംസകള്‍ അറിയിച്ചു. സൗദിയില്‍ നിന്നെത്തിയ ബഹ്റൈന്‍ സന്ദര്‍ശകരെ എയര്‍പോര്‍ട്ടില്‍ വെച്ച് ഷാളണിയിച്ച് സ്വീകരിക്കുകയും ചെയ്തിരുന്നു.