തേഞ്ഞിപ്പലം: കാലിക്കറ്റ് സര്‍വകലാശാലയില്‍ ഉത്തരക്കടലാസുകള്‍ കാണാതാകുന്നത് തുടര്‍ക്കഥയാകുന്നു. കഴിഞ്ഞ ദിവസമാണ് ഉത്തരക്കടലാസ് കാണാനില്ലെന്ന പരാതിയുമായി വിദ്യാര്‍ഥികള്‍ വീണ്ടും സര്‍വകലാശാലയിലെത്തിയത്.
നേരത്തെ ചില കോളജുകളിലെ വിദ്യാര്‍ഥികളുടെ ഉത്തരക്കടലാസ് കാണാതായ സംഭവത്തില്‍ വിദ്യാര്‍ഥികള്‍ വീണ്ടും പരീക്ഷ എഴുതേണ്ടി വന്നിട്ടുണ്ട്. ബിരുദഫലം പുറത്തുവന്നപ്പോള്‍ ചില വിദ്യാര്‍ഥികളുടെ ഫലം ലഭ്യമല്ലാത്തത് അന്വേഷിച്ചപ്പോഴാണ് ഉത്തരക്കടലാസുകള്‍ കാണാനില്ലെന്ന വിവരം വിദ്യാര്‍ഥികള്‍ക്ക് ലഭിക്കുന്നത്.
ചുങ്കത്തറ കോളജിലെ ബി.എസ്.സി മാത്‌സ് രണ്ടാം സെമസ്റ്റര്‍ ഫലം പുറത്തുവന്നപ്പോള്‍ ചില വിദ്യാര്‍ഥികളുടെ ഫലം കാണാതായപ്പോഴാണ് കുട്ടികള്‍ സര്‍വകലാശാലയിലെത്തിയത്. അറബിക് ലിറ്ററേച്ചര്‍ പേപ്പറിന്റെ ഉത്തരക്കടലാസാണ് കാണാതായത്. ഫലം അറിയാത്തത്തിനെ തുടര്‍ന്ന് വിദ്യാര്‍ഥികള്‍ സര്‍വകലാശാലയുമായി ബന്ധപ്പെട്ടപ്പോഴാണ് ഉത്തരക്കടലാസ് കാണാനില്ലെന്ന വിവരം വിദ്യാര്‍ഥികള്‍ക്ക് ലഭിക്കുന്നത്. അഞ്ചുപേരുടെ ഫലമാണ് പ്രസിദ്ധീകരിക്കാതിരുന്നത്. മെയ് 13നാണ് രണ്ടാം സെമസ്റ്റര്‍ ഫലം പ്രസിദ്ധീകരിച്ചത്.

നേരത്തെ പരാതിയുമായി പലതവണ പരീക്ഷാഭവനുമായി ബന്ധപ്പെട്ടെങ്കിലും വ്യക്തമായ ഉത്തരമില്ലെന്ന് വിദ്യാര്‍ഥികള്‍ പറയുന്നു. ഇന്നലെ വീണ്ടും ഫലം ലഭ്യമാവാനായി വിദ്യാര്‍ഥികള്‍ പരീക്ഷാഭവനെ സമീപിച്ചിരിക്കുകയാണ്. ഒരു മാസം മുന്‍പും തൃശൂരിലെ ഒരു കോളജിലെ വിദ്യാര്‍ഥികളുടെ ഫലം തടഞ്ഞുവച്ചിരുന്നു. അന്വേഷിച്ചപ്പോഴാണ് ഉത്തരക്കടലാസ് കാണാനില്ലെന്ന വിവരം ലഭിച്ചത്. ഒടുവില്‍ ആ കുട്ടികളോട് പുനഃപരീക്ഷയെഴുതാന്‍ ഉത്തരവിടുകയായിരുന്നു.
കൊണ്ടോട്ടി ഇ.എം.ഇ.എ കോളജിലെ 20 വിദ്യാര്‍ഥികളുടെ ഫലവും ഉത്തരക്കടലാസ് കാണാത്തതിനെ തുടര്‍ന്ന് തടഞ്ഞുവച്ചിരുന്നു.

ഈ സംഭവങ്ങളില്‍ വിവിധ വിദ്യാര്‍ഥി സംഘടനകളുടെ നേതൃത്വത്തില്‍ പരീക്ഷാഭവനും ഭരണ കാര്യാലയവും ഉപരോധിക്കുന്നതുള്‍പ്പെടെ പ്രക്ഷോഭ സമരങ്ങള്‍ക്കിടയാക്കിയിരുന്നു. കൊണ്ടോട്ടി ഇ.എം.ഇ.എ കോളജിലെ ഉത്തരക്കടലാസ് കാണാത്തതിനെ തുടര്‍ന്ന് വീണ്ടും പരീക്ഷയെഴുതാന്‍ ആവശ്യപ്പെട്ടെങ്കിലും പുനഃപരീക്ഷ പിന്നീട് വേണ്ടെന്ന് വയ്ക്കുകയായിരുന്നു.