ലണ്ടന്‍: ഇന്ത്യക്കെതിരെ ബാറ്റിങ് തെരഞ്ഞെടുത്ത് ഇറങ്ങിയ ഇംഗ്ലണ്ട് തെല്ലൊന്ന് വിറപ്പിച്ചെങ്കിലും പടുകൂറ്റന്‍ റണ്‍സിലേക്ക് കടക്കാതെ 337 റണ്‍സിലൊതുങ്ങി. നിശ്ചിത 50 ഓവറില്‍ ഏഴ് വിക്കറ്റ് നഷ്ടത്തിലാണ് ഇംഗ്ലണ്ടിന്റെ ഭേദമായ സ്‌കോര്‍.

ബൈര്‍സ്‌റ്റോയുടെ 111 എന്ന സെഞ്ചുറി മികവിലാണ് ഇംഗ്ലണ്ട് കുതിപ്പ് തുടങ്ങിയത്. 22.1 ഓവറില്‍ 160 റണ്‍സെടുത്ത് കുതിക്കുന്നതിനിടെ, സബ്‌സ്റ്റിറ്റിയൂട്ട് ഫീല്‍ഡറായി എത്തിയ രവീന്ദ്ര ജഡേജയുടെ തകര്‍പ്പന്‍ ക്യാചിലൂടെ ഇന്ത്യ ആദ്യ വിക്കറ്റ് നേടുകയായിരുന്നു. അപ്പോഴേക്കും ജേസണ്‍ റോയി 66 റണ്‍സ് നേടിയിരുന്നു.

പിന്നാലെ ബൈര്‍സ്‌റ്റോയുടെ വിക്കറ്റ് ഷമി നേടി. ഇംഗ്ലണ്ട് നായകന്‍ ഓയിന്‍ മോര്‍ഗനെ ഷമി പുറത്താക്കിയപ്പോള്‍ മൂന്ന് വിക്കറ്റില്‍ 207 എന്ന നിലയിലായിരുന്നു ഇംഗ്ലണ്ട്.

ലോകകപ്പില്‍ ഇന്ത്യ-ഇംഗ്ലണ്ട് മത്സരത്തില്‍ ടോസ് നേടിയ ഇംഗ്ലണ്ട് ബാറ്റിങ് തിരഞ്ഞെടുത്തു. പുതിയ ഓറഞ്ച് ജേഴ്‌സിയിലാണ് ഇന്ത്യ ഇന്നിറങ്ങുന്നത്. വിജയ് ശങ്കറിന് പകരം റിഷഭ് പന്തിനെ ടീമില്‍ ഉള്‍പ്പെടുത്തിയിട്ടുണ്ട്. പന്തിന്റെ ലോകകപ്പ് അരങ്ങേറ്റ മത്സരമാവുമിത്.