കൊച്ചി: മലയാളി താരം അനസ് എടത്തൊടിക കേരള ബ്ലാസ്റ്റേഴ്‌സ് വിട്ടു. ക്ലബ് അധികൃതരാണ് താരം ക്ലബ് വിടുന്നുവെന്ന കാര്യം അറിയിച്ചത്. എന്നാല്‍ എങ്ങോട്ടാണ് പോകുന്നതെന്ന കാര്യം വ്യക്തമാക്കിയിട്ടില്ല. എ.ടി.കെ കൊല്‍ക്കത്തയിലേക്കാകും അനസ് പോവുക എന്നാണ് വിവരം. കഴിഞ്ഞ സീസണില്‍ കേരള ബ്ലാസ്റ്റേഴ്‌സില്‍ എത്തിയ അനസിന് പരുക്ക് കാരണം പല മത്സരങ്ങളും കളിക്കാന്‍ ആയിരുന്നില്ല. കഴിഞ്ഞ ഐ.എസ്.എല്ലില്‍ എട്ടു മത്സരങ്ങള്‍ മാത്രമാണ് അനസ് കളിച്ചത്. വന്‍ തുക നല്‍കിയാണ് അനസിനെ കൊല്‍ക്കത്തയിലെത്തിച്ചിട്ടുള്ളത്.

ഡല്‍ഹി ഡൈനാമോസിന്റെ സെന്റര്‍ ബാക്ക് സുയിവര്‍ ലൂണെ കേരള ബ്ലാസ്റ്റേഴ്‌സ് സ്വന്തമാക്കിയപ്പോള്‍ തന്നെ അനസ് ക്ലബ് വിടുകയാണെന്ന് സൂചനയു@ണ്ടായിരുന്നു. അനസ് ക്ലബ് വിടുന്നതോടെ ജിങ്കനുമൊത്തുള്ള ബ്ലാസ്റ്റേഴ്‌സിന്റെ പ്രതിരോധക്കോട്ടക്ക് വിള്ളല്‍ സംഭവിക്കും. കോണ്ടിനെന്റല്‍ കപ്പിനുള്ള ക്യാംപിലുള്ള അനസ് എടത്തൊടിക ഇക്കാര്യത്തെ കുറിച്ച് പ്രതികരിച്ചിട്ടില്ല.