തിരുവനന്തപുരം: തദ്ദേശ സ്വയംഭരണ സ്ഥാപനങ്ങളിലേക്ക് 2020ല്‍ നടക്കുന്ന തെരഞ്ഞെടുപ്പില്‍ പ്രവാസി വോട്ട് നടപ്പാക്കുന്നതിന് മുന്‍പ് ചര്‍ച്ച വേണമെന്ന് മുഖ്യമന്ത്രി പിണറായി വിജയന്‍. പ്രതിപക്ഷ ഉപനേതാവ് എം.കെ മുനീറിന്റെ ശ്രദ്ധക്ഷണിക്കല്‍ പ്രമേയത്തിന് മറുപടിയായാണ് മുഖ്യമന്ത്രി ഇക്കാര്യം അറിയിച്ചത്.
നിലവിലെ വ്യവസ്ഥകളനുസരിച്ച് വോട്ട് ചെയ്യുന്നതിന് സമ്മതിദായകന്റെ ശാരീരിക സാന്നിധ്യം പോളിങ് സ്റ്റേഷനില്‍ ആവശ്യമാണ്. ഇക്കാര്യത്തില്‍ പ്രവാസി കേരളീയര്‍ക്കുള്ള ബുദ്ധിമുട്ട് പരിഹരിക്കുന്നതിനായി പ്രോക്‌സി വോട്ടിങ് സംവിധാനം പരിഗണിക്കാന്‍ സംസ്ഥാന തെരഞ്ഞെടുപ്പ് കമ്മിഷന്‍ 1994ലെ കേരള പഞ്ചായത്തീരാജ് ആക്റ്റ് ഭേദഗതി ചെയ്യാന്‍ സര്‍ക്കാരിനോട് ആവശ്യപ്പെട്ടിട്ടുണ്ട്.
വോട്ടര്‍പട്ടിക തയാറാക്കല്‍, വോട്ടര്‍മാരുടെ ഐഡന്റിറ്റി, തെരഞ്ഞെടുപ്പിന്റെ രഹസ്യസ്വഭാവം, വോട്ട് രേഖപ്പെടുത്തല്‍ എന്നിവ സംബന്ധിച്ച് നിയമനിര്‍മാണത്തിന് മുന്‍പ് വ്യക്തമായ മാര്‍ഗരേഖകള്‍ ആവശ്യമാണ്. ഇതിനായി ബന്ധപ്പെട്ട വകുപ്പുകളുമായും വിവിധ രാഷ്ട്രീയപാര്‍ട്ടികളുമായും ചര്‍ച്ച നടത്തേണ്ടതുണ്ട്. സുതാര്യത ഉറപ്പുവരുത്തി പ്രവാസികള്‍ക്ക് നിഷ്പക്ഷമായ രീതിയില്‍ വോട്ട് ചെയ്യുന്നതിനുള്ള സംവിധാനമാണ് ഒരുക്കേണ്ടതെന്നും മുഖ്യമന്ത്രി പറഞ്ഞു.