ചൊക്ലി: പുല്ലൂക്കര മുക്കില്‍ പീടികയില്‍ വിദ്യാര്‍ഥികള്‍ക്ക് നേരെ ഗുണ്ടാ ആക്രമണം. പരുക്കേറ്റ ഡിഗ്രി വിദ്യാര്‍ഥികളായ കെ. അഫ്‌നാസ്(20), കെ.വി റിയാസ്(19), ഷിഹാബ്(20), കെ.കെ സഫീര്‍(19), ഫായിസ്(18) എന്നിവരെ ചൊക്ലി സി.എം.സി ആശുപത്രിയില്‍ പ്രവേശിപ്പിച്ചു. ഓമ്‌നിവാനില്‍ വന്നവരാണ് ആക്രമിച്ചതെന്ന് പരുക്കേറ്റവര്‍ പറഞ്ഞു. ഇന്നലെ രാത്രി 10 മണിയോടെ പരുക്കേറ്റവരെ ആശുപത്രിയില്‍ കാണാന്‍ വന്ന പുല്ലൂക്കരയിലെ ആദില്‍ ഗുലാംസിനെ ഒരു സംഘം മര്‍ദിച്ചതായും പരാതിയുണ്ട്.
ഇന്നലെ വൈകുന്നേരം മാരുതി കാറില്‍ വന്ന മുണ്ടത്തോട് സ്വദേശികള്‍ റോഡ് സൈഡില്‍ നിര്‍ത്തിയിട്ടിരുന്ന ബൈക്ക് മാറ്റാന്‍ ആവശ്യപ്പെട്ടത് നാട്ടുകാരുമായി വാക്കുതര്‍ക്കത്തിനിടയാക്കിയിരുന്നു. സംഭവം കണ്ട നഗരസഭാ കൗണ്‍സിലര്‍ ഇരു വിഭാഗങ്ങളെയും പിന്തിരിപ്പിക്കുകയായിരുന്നുവെന്ന് നാട്ടുകാര്‍ പറഞ്ഞു. തുടര്‍ന്നാണ് ഓമ്‌നി വാനില്‍ മാരകായുധങ്ങളുമായി വന്ന സംഘം വിദ്യാര്‍ഥികള്‍ക്ക് നേരെ ആക്രമണം നടത്തിയത്. തലശ്ശേരി ഡിവൈ.എസ്.പി പ്രിന്‍സ് അബ്രഹാം, ചൊക്ലി പ്രിന്‍സിപ്പല്‍ എസ്.ഐ ഫായിസ് അലി എന്നിവര്‍ സംഭവ സ്ഥലത്തെത്തി. പരുക്കേറ്റ് ആശുപത്രിയില്‍ കഴിയുന്ന വിദ്യാര്‍ഥികളെ പാനൂര്‍ നഗരസഭാ ചെയര്‍പേഴ്‌സണ്‍ കെ.വി റംല സന്ദര്‍ശിച്ചു.