ന്യൂഡല്‍ഹി: പ്രളയക്കെടുതി അതിജീവിച്ചുവരുന്ന കേരളത്തിന് വിവിധ രാജ്യങ്ങള്‍ നല്‍കാമെന്നേറ്റ സഹായങ്ങള്‍ സ്വീകരിക്കുന്ന കാര്യത്തില്‍ പ്രധാനമന്ത്രി നരേന്ദ്ര മോദിയുമായി മുഖ്യമന്ത്രി പിണറായി വിജയന്‍ നടത്തിയ കൂടിക്കാഴ്ചയിലും തീരുമാനമായില്ല. വിവിധ രാജ്യങ്ങളില്‍ നിന്നുള്ള സഹായ വാഗ്ദാനം സംബന്ധിച്ച് പ്രധാനമന്ത്രിയുടെ ശ്രദ്ധയില്‍പ്പെടുത്തിയപ്പോള്‍ വിദേശസഹായം സ്വീകരിക്കുന്നതു സംബന്ധിച്ച നിലവിലെ ചട്ടങ്ങള്‍ വിശദീകരിക്കുകയാണ് അദ്ദേഹം ചെയ്തതെന്ന് കൂടിക്കാഴ്ചയ്ക്കു ശേഷം കേരളാ ഹൗസില്‍ നടത്തിയ വാര്‍ത്താസമ്മേളനത്തില്‍ മുഖ്യമന്ത്രി പറഞ്ഞു. കേരളത്തിന്റെ പുനര്‍നിര്‍മാണത്തിന് പ്രധാനമന്ത്രി നരേന്ദ്ര മോദി പൂര്‍ണ പിന്തുണ അറിയിച്ചതായും മുഖ്യമന്ത്രി പറഞ്ഞു1
കേന്ദ്രസര്‍ക്കാരും വിവിധ ഏജന്‍സികളും നല്‍കിയ നിര്‍ലോപമായ പിന്തുണക്ക് പ്രധാനമന്ത്രിയെ മുഖ്യമന്ത്രി നന്ദി അറിയിച്ചു. ദുരിതാശ്വാസ പ്രവര്‍ത്തനങ്ങള്‍ പൂര്‍ണതയിലേക്ക് നീങ്ങുമ്പോഴും 700 കുടുംബങ്ങള്‍ ഇപ്പോഴും ക്യാംപുകളില്‍ കഴിയുന്നുണ്ട്. ലോകത്തിനു തന്നെ മാതൃകയാകുന്ന രീതിയിലുള്ള സമഗ്രമായ രക്ഷാപ്രവര്‍ത്തനമാണ് സംസ്ഥാനത്ത് നടന്നത്. ചളി നിറഞ്ഞ ആറു ലക്ഷത്തിലേറെ വീടുകള്‍ വൃത്തിയാക്കി. കിണറുകള്‍ വൃത്തിയാക്കുക, പരിസരം ശുചിയാക്കുക, അണുവിമുക്തമാക്കുക തുടങ്ങി സംഘടിതമായ പ്രവര്‍ത്തനങ്ങളാണ് നടന്നത്. രക്ഷാപ്രവര്‍ത്തനങ്ങളുടെ ഘട്ടം കഴിഞ്ഞു. പ്രവര്‍ത്തനങ്ങളില്‍ മത്സ്യത്തൊഴിലാളികളുടെയും യുവാക്കളുടെയും പങ്ക് എടുത്തുപറയേണ്ടതാണെന്നും മുഖ്യമന്ത്രി വിശദീകരിച്ചു.
കേരളത്തിന്റെ ആവശ്യങ്ങളെല്ലാം പ്രധാനമന്ത്രി നരേന്ദ്രമോദി നല്ല നിലയില്‍ കേട്ടതായി കൂടിക്കാഴ്ചയ്ക്കു ശേഷം മുഖ്യമന്ത്രി പറഞ്ഞു. എല്ലാറ്റിലും അനുകൂലമായ നടപടികള്‍ ഉണ്ടാവുമെന്നാണ് പ്രതീക്ഷിക്കുന്നതെന്നും അദ്ദേഹം പറഞ്ഞു. കൂടിക്കാഴ്ചയ്ക്കു പിന്നാലെ തന്നെ വിവിധ വകുപ്പുകള്‍ക്ക് പ്രധാനമന്ത്രി നിര്‍ദേശങ്ങള്‍ നല്‍കി. കേരളത്തിന്റെ ആവശ്യങ്ങള്‍ സംബന്ധിച്ച തുടര്‍നടപടികള്‍ക്കായി ബന്ധപ്പെടാന്‍ സംസ്ഥാന ചീഫ് സെക്രട്ടറി ടോംജോസിന് പ്രധാനമന്ത്രി നിര്‍ദേശം നല്‍കിയിട്ടുണ്ടെന്നും അദ്ദേഹം പറഞ്ഞു.