ആദ്യ സമിതിയുടെ കണ്ടെത്തലുകള്‍
പരിശോധിക്കുക ലക്ഷ്യം
സ്വന്തം ലേഖകന്‍
തിരുവനന്തപുരം: വിവാദമായ സ്പ്രിംഗ്ലര്‍ കരാറുമായി ബന്ധപ്പെട്ട് വീണ്ടും അന്വേഷണ സമിതിയെ നിയോഗിച്ച് സര്‍ക്കാര്‍. ഈ കരാര്‍ സംബന്ധിച്ച് ആദ്യം പരിശോധന നടത്തിയ മാധവന്‍ നമ്പ്യാര്‍ സമിതിയുടെ കണ്ടെത്തലുകള്‍ പരിശോധിക്കുന്നതിനാണ് പുതിയ സമിതിയെ നിയോഗിച്ചത്. റിട്ട. ജില്ല ജഡ്ജി കെ. ശശിധരന്‍ നായരുടെ നേതൃത്വത്തിലാണ് പുതിയ മൂന്നംഗ സമിതി. സ്പ്രിംഗ്ലര്‍ കമ്പനിയെ തെരഞ്ഞെടുത്തതില്‍ വീഴ്ച സംഭവിച്ചുവെന്നായിരുന്നു ആദ്യ സമിതിയുടെ റിപ്പോര്‍ട്ട്.ഇത് പുറത്തുവിടാതെയാണ് വീണ്ടും അന്വേഷണ സമിതിയെ നിയോഗിച്ചിരിക്കുന്നത്. ആദ്യ റിപ്പോര്‍ട്ടിനെ അട്ടിമറിക്കാനുളള നീക്കമാണിതെന്ന് ഇപ്പോള്‍ത്തന്നെ ആക്ഷേപം ഉയര്‍ന്നിട്ടുണ്ട്. ആദ്യസമിതിക്കു നല്‍കിയ വിഷയങ്ങളാണ് രണ്ടാമത്തെ സമിതിക്കും അന്വേഷണത്തിനായി നല്‍കിയത്. ആദ്യസമിതിയുടെ കണ്ടെത്തല്‍ വീണ്ടും പരിശോധിക്കണമെന്നതാണ് ഇതില്‍ അധികമായുള്ളത്. രണ്ടുമാസത്തിനകം റിപ്പോര്‍ട്ട് നല്‍കണമെന്നാണ് പുതിയ സമിതിക്ക് നല്‍കിയിരിക്കുന്ന നിര്‍ദേശം.