ഫറോക്ക്: ഹിമാചല്‍ പ്രദേശിലുണ്ടായ ശക്തമായ പ്രളയത്തില്‍ കുടുങ്ങിയ രാമനാട്ടുകരയില്‍ നിന്നുള്ള 25 അംഗസംഘം ചണ്ഡിഗഡില്‍ സുരക്ഷിതരാണെന്നു വിവരം. ഈ മാസം 19നു നെടുമ്പാശ്ശേരിയില്‍ നിന്ന് മണാലിയിലേക്ക് വിനോദ സഞ്ചാരത്തിനായി പോയ രാമനാട്ടുകരയിലെ വ്യാപാരികളടക്കമുള്ള സംഘമാണു പ്രളയത്തില്‍ അകപ്പെട്ടത്. കോക്ക്‌സ് ആന്‍ഡ് കിങ്‌സ്, ടൂര്‍സ് ആന്‍ഡ് ട്രാവല്‍ ഏജന്‍സിയാണ് ഇവരെ മണാലിയിലേക്കു വിനോദയാത്രയ്ക്ക് കൊണ്ടുപോയത്.
കുത്തിയൊലിച്ചെത്തിയ വെള്ളത്തില്‍ റോഡുകളടക്കം ഒലിച്ചുപോയതിനാല്‍ ഇവരുടെ യാത്ര തടസപ്പെടുകയായിരുന്നു. മലവെള്ളപ്പാച്ചിലില്‍ ബിയാസ് നദിക്കു സമീപം നിര്‍ത്തിയിട്ട വാഹനങ്ങള്‍ ഒലിച്ചുപോകുന്ന കാഴ്ച സംഘത്തെ ഭീതിയിലാഴ്ത്തി. തിങ്കളാഴ്ച രാവിലെ തന്നെ രോതന്‍പാസ് വഴി മടങ്ങാനുള്ള ശ്രമം ശക്തമായ മഴകാരണം ഉപേക്ഷിച്ചു. മണാലിയില്‍ നിന്നുള്ള പ്രധാന റോഡുകളെല്ലാം കൂറ്റന്‍കല്ലുകളാല്‍ നിറഞ്ഞിരിക്കുകയാണ്. ഇതിനാല്‍ സംഘം യാത്ര ചെയ്തിരുന്ന ബസ് ഉപേക്ഷിച്ച് ചെറിയ വാഹനങ്ങളെ ആശ്രയിച്ചു. റോഡിലെ കല്ലുകള്‍ എടുത്തുമാറ്റിയും നടന്നും യാത്ര ചെയ്താണു സംഘം ചണ്ഡിഗഡില്‍ സുരക്ഷിത താവളത്തിലെത്തിയിരിക്കുന്നത്.