മഞ്ചേരി: അനധികൃതമായി പ്രവര്‍ത്തിക്കുന്ന പ്ലാസ്റ്റിക് പ്രിന്റിംങ് കമ്പനിക്ക് നഗരസഭ അധികൃതര്‍ സ്റ്റോപ്പ് മെമ്മോ നല്‍കി. കമ്പനിക്കെതിരെ നടപടിയെടുക്കാനുള്ള നഗരസഭാ കൗണ്‍സില്‍ യോഗ തീരുമാനം നടപ്പാക്കാത്തതിനെതിരെ പ്രതിഷേധം ഉയര്‍ന്നതോടെയാണ് നടപടിയുമായി അധികൃതര്‍ രംഗത്തെത്തിയത്. കമ്പനിക്കെതിരെയുള്ള നടപടി പ്രമേയത്തില്‍ ഒതുക്കിയതുമായി ബന്ധപ്പെട്ട് 23 ന് സുപ്രഭാതം വാര്‍ത്ത നല്‍കിയിരുന്നു.
നഗരസഭയിലെ പതിനഞ്ചാം വാര്‍ഡില്‍ കോവിലകംകുണ്ട് നോര്‍ത്തില്‍ മഞ്ചുരുളിയില്‍ പ്രവര്‍ത്തിക്കുന്ന പ്ലാസ്റ്റിക് പ്രിന്റിംങ് കമ്പനിക്കെതിരെ കൗണ്‍സില്‍ പ്രമേയം പാസാക്കിയിട്ട് ദിവസങ്ങള്‍ പിന്നിട്ടെങ്കിലും തുടര്‍നടപടികള്‍ സ്വീകരിക്കാന്‍ അധികൃതര്‍ മടിക്കുകയാണെന്ന് പ്രദേശവാസികള്‍ ആരോപിച്ചിരുന്നു. ഇതോടെയാണ് പ്രമേയത്തെ വകവക്കാതെ പ്രവര്‍ത്തനം തുടര്‍ന്ന കമ്പനിയോട് നിര്‍ത്തിവെക്കാനുള്ള നിര്‍ദേശം നല്‍കിയത്. നഗരസഭയുടെ അസസ്‌മെന്റ് രജിസ്റ്ററില്‍ ലോഡ്ജ് മുറികളായി രേഖപ്പെടുത്തിയ കെട്ടിടത്തിലാണ് നിരവധി ആരോഗ്യ പ്രശ്‌നങ്ങള്‍ക്ക് കാരണമായേക്കാവുന്ന തരത്തില്‍ പ്ലാസ്റ്റിക് നിര്‍മാണ കമ്പനി പ്രവര്‍ത്തിക്കുന്നത്.
നഗരസഭയുടെ രേഖയില്‍ ജനവാസമേഖലയായി അടയാളപ്പെടുത്തിയ സ്ഥലത്ത് നിയമം ലംഘിച്ച് കമ്പനി പ്രവര്‍ത്തനം തുടരുന്ന കമ്പനിക്കെതിരെ നാട്ടുകാര്‍ സമരസമിതി രൂപീകരിച്ച് രംഗത്ത് വന്നിരുന്നു. കമ്പനിയില്‍ നിന്നും ഉണ്ടാകുന്ന രൂക്ഷമായ ഗന്ധവും കെമിക്കലുകളുടെ ഉപയോഗവും മൂലം നിരവധിയാളുകള്‍ക്ക് ശാരീരിക പ്രയാസങ്ങള്‍ അനുഭവപ്പെടുന്നതായി പരിസരവാസികള്‍ പറഞ്ഞു.
കമ്പനിയുടെ പ്രവര്‍ത്തനം നഗരസഭ ഇടപെട്ട് തടയണമെന്നാവശ്യപ്പെട്ട് മുഖ്യമന്ത്രി, കലക്ടര്‍, ജില്ലാ മെഡിക്കല്‍ ഓഫീസര്‍, പൊലൂഷന്‍ കണ്‍ട്രോള്‍ ബോര്‍ഡ്, തഹസില്‍ദാര്‍, മഞ്ചേരി സി.ഐ, നഗരസഭാ സെക്രട്ടറി, ചെയര്‍പേഴ്‌സണ്‍ എന്നിവര്‍ക്ക് ഒപ്പുശേഖരണം നടത്തി പരാതിയും നല്‍കിയിരുന്നു.