കക്കട്ടില്‍: പാതിരിപ്പറ്റ കാപ്പുംചാലില്‍ ബി.ജെ.പി പ്രവര്‍ത്തകന്റെ വീടിനു നേരെ ബോംബേറ്. ഹിന്ദു ഐക്യവേദി ജില്ലാ സെക്രട്ടറി വാതുക്കല്‍ പറമ്പത്ത് ജിനേവ വതഷി(നന്ദന്‍)ന്റെ വീടിനു നേരെയാണ് തിങ്കളാഴ്ച അര്‍ധരാത്രി ബോംബെറിഞ്ഞത്. വീട്ടു വരാന്തയിലെ ചുമരില്‍ തട്ടിയാണ് ബോംബ് പൊട്ടിയത്. ട്യൂബ് ലൈറ്റ് തകര്‍ന്നു. സ്‌ഫോടനത്തിന്റെ ആഘാതത്തില്‍ ബോധരഹിതയായ ജിതേഷിന്റെ ഭാര്യ ബിജി(25)യെ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. സ്‌ഫോടനത്തിനു ശേഷം വീടിനു നേരെ കല്ലേറും നടന്നു. കല്ലേറില്‍ വീടിന്റെ ജനല്‍ചില്ലുകള്‍ തകര്‍ന്നു. കഴിഞ്ഞദിവസം പാതിരിപ്പറ്റ ചെറിയ കൈവേലിയില്‍ ബി.ജെ.പി പൊതുയോഗം നടക്കുന്ന സ്ഥലത്തിനടുത്ത് ബോംബ് സ്‌ഫോടനം നടന്നിരുന്നു.