കോഴിക്കോട്: മഴക്കാലരോഗങ്ങളെ ചെറുക്കാന്‍ വിവിധ പദ്ധതികളുമായി കോര്‍പറേഷന്‍. മഴക്കാലത്ത് ഉണ്ടായേക്കാവുന്ന രോഗങ്ങളെ കാര്യക്ഷമമായി നേരിടുന്നതിനായും  നഗരത്തില്‍ നടപ്പിലാക്കേണ്ട വിവിധ പദ്ധതികളെക്കുറിച്ച് രൂപരേഖ  തയാറാക്കുന്നതിനായും  കോഴിക്കോട് സ്വഛ് ഭാരത് മിഷനും (അര്‍ബന്‍) നഗരസഭ ഹെല്‍ത്ത് വിഭാഗവും സംയുക്തമായി നഗരസഭയിലെ റസിഡന്‍സ് അസോസിയേഷനുകളുടെ സഹകരണത്തോടെ മഴക്കാല പൂര്‍വ ശൂചീകരണ ശില്‍പശാല നടത്തി.
കോഴിക്കോട് ടാഗോര്‍ ഹാളില്‍ നടന്ന ശില്‍പശാല മേയര്‍ തോട്ടത്തില്‍ രവീന്ദ്രന്‍ ഉദ്ഘാടനം ചെയ്തു.
മഴക്കാലമെത്തുന്നതിന് മുന്‍പ് നഗരത്തെ രോഗങ്ങളില്‍ നിന്ന് മുക്തമാക്കുക എന്ന ലക്ഷ്യത്തോടെയാണ് ഇത്തരത്തില്‍ ശില്‍പശാലകള്‍ സംഘടിപ്പിക്കുന്നതെന്നും ശുചീകണ പ്രവര്‍ത്തനങ്ങളില്‍ എല്ലാവരും പങ്കാളികളാവണമെന്നും അദ്ദേഹം പറഞ്ഞു.
കോര്‍പറേഷന്‍ ആരോഗ്യകാര്യ സമിതി ചെയര്‍മാന്‍ കെ.വി ബാബുരാജ് അധ്യക്ഷനായി.
കൗണ്‍സിലര്‍ നമ്പിടി നാരായണന്‍, ശുചിത്വമിഷന്‍ ജില്ലാ കോഡിനേറ്റര്‍ കെ.പി വേലായുധന്‍, സ്വഛ് ഭാരത് മിഷന്‍ അര്‍ബന്‍ നോഡല്‍ ഓഫിസര്‍ എം.വി റംസി ഇസ്മായില്‍, സീനിയര്‍ ഹെല്‍ത്ത് ഇന്‍സ്‌പെക്ടര്‍ ശിവദാസന്‍ സംസാരിച്ചു. ശില്‍പശാലയുടെ ഭാഗമായി നഗരസഭയിലെ ശുചീകരണ പ്രവര്‍ത്തനങ്ങളിലും കുടുംബശ്രീ ഖരമാലിന്യ തൊഴിലാളികളിലും മികച്ച പ്രവര്‍ത്തനം കാഴ്ചവച്ച കെ. വാസു, ഇ. പീതാംബരന്‍, സി. ലക്ഷ്മി, ആഭിത സക്കീര്‍, വിമല എന്നിവരെ ആദരിച്ചു.
ഡോ. മെഹറൂഫ് രാജ്, ഡോ. ടി. ജയകൃഷ്ണന്‍, ഡോ. ആര്‍.എസ്. ഗോപകുമാര്‍, ജോഷി വര്‍ഗീസ് എന്നിവര്‍ ക്ലാസെടുത്തു. വാര്‍ഡ് തലങ്ങളില്‍ റസിഡന്‍സ് അസോസിയേഷനുകളുടെ സഹായത്തോടെ മഴക്കാല രോഗങ്ങളെ തടയാനുള്ള പ്രാരംഭ പ്രവര്‍ത്തനങ്ങള്‍ക്ക് ശില്‍പശാല രൂപം നല്‍കി.