തിരുവനന്തപുരം: മഹാത്മാഗാന്ധി സര്‍വകലാശാലയില്‍ 26.26 കോടി രൂപയുടെ സാമ്പത്തിക ക്രമക്കേടുകള്‍ നടന്നതായി കംപ്‌ട്രോളര്‍ ആന്‍ഡ് ഓഡിറ്റര്‍ ജനറലിന്റെ കണ്ടെത്തല്‍. യു.ജി.സി നിര്‍ദേശിച്ച പ്രകാരം ഒരു ഏകീകൃത പാഠ്യപദ്ധതി തയാറാക്കുന്നതില്‍ സര്‍വകലാശാല പരാജയപ്പെട്ടതായും സി.എ.ജി റിപ്പോര്‍ട്ടില്‍ പറയുന്നു.
ഉത്തരക്കടലാസ് മൂല്യനിര്‍ണയം നടത്തിയതിന് സ്ഥിരം അധ്യാപകര്‍ക്ക് അര്‍ഹമായതിലധികം വേതനം നല്‍കിയതിനാല്‍ 13.97 കോടിയുടെ ബാധ്യതയാണുണ്ടായത്. നിര്‍ത്തലാക്കിയ തസ്തികകളില്‍ സര്‍ക്കാര്‍ ഉത്തരവുകള്‍ ലംഘിച്ച് സ്ഥാനക്കയറ്റം നല്‍കിയതിനാല്‍ 13.36 ലക്ഷത്തിന്റെ അധികബാധ്യതയുണ്ടണ്ടായി. സര്‍വിസില്‍ പ്രവേശിച്ച തിയതി മുതല്‍ ഇ.പി.എഫ് പദ്ധതിയില്‍ ഉദ്യോഗസ്ഥരെ ചേര്‍ക്കുന്നതില്‍ സര്‍വകലാശാല പരാജയപ്പെട്ടതിനാല്‍ 2.20 കോടിയുടെയും പലിശ, നഷ്ടം എന്നീയിനത്തില്‍ 3.78 കോടിയുടെയും ബാധ്യത വന്നു.
സിന്‍ഡിക്കേറ്റ് തീരുമാനം നടപ്പാക്കുന്നതിലെ പരാജയവും കരാര്‍ വ്യവസ്ഥകളില്‍ ഇളവു വരുത്തിയതും യു.ജി.സിയുടെയും സംസ്ഥാന സര്‍ക്കാരിന്റെയും ധനസഹായം നേടിയെടുക്കുന്നതില്‍ സര്‍വകലാശാല പരാജയപ്പെട്ടതും കാരണം 3.98 കോടിയുടെ നഷ്ടമുണ്ടണ്ടായി.
സര്‍ക്കാര്‍ നിര്‍ദേശങ്ങള്‍ക്ക് വിരുദ്ധമായി സര്‍വകലാശാലാ ജീവനക്കാര്‍ക്ക് അനര്‍ഹമായി വീട്ടുവാടക അലവന്‍സ് നല്‍കി. ഈ വകയില്‍ 2.20 കോടിയുടെ നഷ്ടമുണ്ടണ്ടായി. സര്‍വകലാശാലയിലെ ആന്തരിക ഓഡിറ്റ് വിഭാഗം ഇല്ലാതിരുന്നത് ആന്തരിക നിയന്ത്രണ സംവിധാനത്തിലെ പോരായ്മകള്‍ക്കു കാരണമായി. ഒരു മുഴുവന്‍ സമയ ഡയറക്ടറെ നിയമിക്കാത്തതിനാല്‍ യു.ജി.സി വിഭാവനം ചെയ്ത കോളജ് ഡവലപ്പ്‌മെന്റ് കൗണ്‍സില്‍ ഫലപ്രദമായില്ല. പരീക്ഷാ ഫലവും പുനഃപരിശോധനാ ഫലവും പ്രഖ്യാപിക്കുന്നതില്‍ ഒന്നു മുതല്‍ ഒമ്പതു വരെ മാസം കാലതാമസം സംഭവിച്ചു. അപേക്ഷ ലഭിച്ച് ആറ ുമാസത്തിനു ശേഷമാണ് 59 ശതമാനം ബിരുദ സാക്ഷ്യപത്രങ്ങള്‍ നല്‍കിയത്. യു.ജി.സി അംഗീകാരമില്ലാതെയാണ് പഞ്ചവത്സര സംയോജിത വിവിധ വിജ്ഞാന പഠന പദ്ധതിയും സംയോജിത ഇരട്ട ബിരുദ ബി.എ ക്രിമിനോളജി, എല്‍.എല്‍.ബി (ഓണേഴ്‌സ്) എന്നിവയും ആരംഭിച്ചത്. റിസര്‍ച്ച് ഗൈഡുകളായി തെരഞ്ഞെടുത്ത 197 അധ്യാപകര്‍ക്ക് യു.ജി.സി യോഗ്യതയുണ്ടണ്ടായിരുന്നില്ലെന്നും റിപ്പോര്‍ട്ടിലുണ്ട്.