നാദാപുരം : കാട്ടാന കൂട്ടം കൃഷിനശിപ്പിച്ച വളയം കണ്ടിവാതുക്കല്‍ മലയിലെ കര്‍ഷകരുടെയും മലയോര വാസികളുടെയും പ്രശ്‌നങ്ങള്‍ ചര്‍ച്ച ചെയ്യാനായി ജനപ്രതിനിധികളുടെയും ഉദ്യോഗസ്ഥരുടെയും യോഗം ചേര്‍ന്നു.
വളയത്ത് നടന്ന യോഗത്തില്‍ കാട്ടാന നാശം വിതച്ച മേഖലകളില്‍ വാച്ചര്‍മാരെ നിയമിക്കാനും സോളാര്‍ സംവിധാനം ഏര്‍പ്പെടുത്താനും തീരുമാനമായി .
നാശ നഷ്ടം സംഭവിച്ച മേഖലകളില്‍ കണക്കെടുപ്പിനായി എ.ഡി.എമിനെ ചുമതലപ്പെടുത്തി . ഭീഷണിയെ തുടര്‍ന്ന് ആയോട് മലയില്‍ പ്രവര്‍ത്തിക്കുന്ന അങ്കണവാടിയുടെ പ്രവര്‍ത്തനം ഇനി ഒരു അറിയിപ്പ് ഉണ്ടാവുന്നത് വരെ നിര്‍ത്തി വെക്കാന്‍ തീരുമാനിച്ചു.
വളയം പഞ്ചായത്തിലെ ആയോട് മല, ചെക്യാട് പഞ്ചായത്തിലെ കണ്ടി വാതുക്കല്‍ തുടങ്ങിയ മലയോര മേഖലകളില്‍ കാട്ടാനകളുടെ ആക്രമണത്തില്‍ നിരവധി കര്‍ഷകരുടെ കാര്‍ഷിക വിളകളാണ് നശിച്ചത് .
വലിയ പറമ്പില്‍ സെബ്യാസ്റ്റ്യന്‍, കാട്ടികുഴി കേളപ്പന്‍ , കുന്നുമ്മല്‍ ചന്തൂട്ടി, ഓടച്ചാലില്‍ ബാലകൃഷ്ണന്‍, ലക്ഷമണന്‍ , കുന്നുമ്മല്‍ ജയന്‍ തുടങ്ങിയ കര്‍ഷകരുടെ തെങ്ങ്, കവുങ്ങ്, റബര്‍ ഉല്‍പ്പെടെയുള്ള കാര്‍ഷിക വിളകളാണ് നശിപ്പിച്ചത്.
പകല്‍ സമയങ്ങളില്‍ പോലും ആനകള്‍ കൂട്ടമായെത്തിയാണ് കാര്‍ഷിക വിളകള്‍ നശിപ്പിക്കുന്നത്. കഴിഞ്ഞ ദിവസം ആയോട് മലയില്‍ പ്രവര്‍ത്തിക്കുന്ന അങ്കണവാടിയുടെ അന്‍പത് മീറ്റര്‍ അകലെ വരെ കാട്ടാനകൂട്ടം എത്തിയിരുന്നു.
കണ്ണൂര്‍ കോഴിക്കോട് ജില്ലകളുടെ വനാതിര്‍ത്തികളില്‍ നിന്നുമാണ് ആനകള്‍ കൂട്ടമായി എത്തുന്നത്. വിളകള്‍ നശിപ്പിച്ച പ്രദേശങ്ങള്‍ വളയം പഞ്ചായത്ത് പ്രസിഡന്റ് എം സുമതി, സ്ഥിരം സമിതി അധ്യക്ഷന്‍ എ.കെ രവിന്ദ്രന്‍, പഞ്ചായത്തംഗം സി.പി അംബുജ, വി.കെ രവി, വി.പി ചന്ദ്രന്‍, രാജിവന്‍ സന്ദര്‍ശിച്ചു.