പയ്യന്നൂര്‍: കണ്ണൂര്‍ പയ്യന്നൂര്‍ രാമന്തളിയില്‍ ആര്‍.എസ്.എസ് പ്രവര്‍ത്തകനായ ബിജുവിനെ കൊലപ്പെടുത്തിയ കേസിലെ മുഖ്യപ്രതി ടി.പി അനൂപ് പിടിയില്‍. സി.പി.എം ലോക്കല്‍ കമ്മിറ്റി അംഗവും ഡി.വൈ.എഫ്.ഐ നേതാവുമായ അനൂപിനെ ഇന്നലെ രാത്രിയാണ് പൊലിസ് അറസ്റ്റു ചെയ്തത്.

ഇതോടെ കോസില്‍ അറസ്റ്റിലായവരുടെ എണ്ണം അഞ്ചായി. ഇന്നലെ രാത്രി പയ്യന്നൂര്‍ കെ.എസ്.ആര്‍.ടി.സി ബസ് സ്റ്റാന്‍ഡിനു സമീപത്തു വ്ച്ചാണ് ഇയാളെ പൊലിസ് പിടികൂടിയത്. ഡി.വൈ.എഫ്.ഐ ബ്ലോക്ക് ട്രഷറര്‍ ആണ് ഇദ്ദേഹം.

കഴിഞ്ഞയാഴ്ചയാണ് ആര്‍.എസ്.എസ് രാമന്തളി മണ്ഡലം കാര്യവാഹക് ചൂരക്കാട്ട് ബിജു കൊല്ലപ്പെട്ടത്. പഴയങ്ങാടി റെയില്‍വേ സ്റ്റേഷനില്‍നിന്നു സുഹൃത്തിനൊപ്പം ബൈക്കില്‍ വരികയായിരുന്ന ബിജുവും സുഹൃത്ത് രാജേഷും സഞ്ചരിച്ച ബൈക്കിനെ മുട്ടം പാലത്തിനു സമീപം വച്ച് ഇന്നോവ കാറിലെത്തിയ സംഘം ഇടിച്ചുവീഴ്ത്തി ബിജുവിനെ കഴുത്തിനു വെട്ടിയാണ് കൊലപ്പെടുത്തിയിരുന്നത്. സി.പി.എം പ്രവര്‍ത്തകന്റെ കൊലപാതകത്തിലെ പ്രതിയായിരുന്നു കൊല്ലപ്പെട്ട ബിജു.