നെയ്യാറ്റിന്‍കര: തിരുപുറം പുത്തന്‍കട ചന്തയ്ക്കു സമീപത്തെ റോഡരികിലെ  അനധികൃത ചന്ത  ജനജീവിതം
ദുസ്സഹമാക്കുന്നു.
തൊട്ടടുത്ത് അംഗീകൃത ചന്ത ഉണ്ടായിട്ടും പച്ചക്കറി-മല്‍സ്യ കച്ചവടം റോഡരികിലാണ് നടക്കുന്നത്. ചന്ത കൂടുമ്പോഴുണ്ടാകുന്ന തിക്കും തിരക്കും  കാല്‍നടയാത്രികരെയും വാഹന യാത്രികരെയും വലക്കുകയാണ്. ആഴ്ചയില്‍ ആറ് ദിവസം പ്രവര്‍ത്തിക്കുന്ന ചന്തയ്ക്കു സമീപത്തെ റോഡില്‍  ഈ ദിവസങ്ങളിലെല്ലാം അപകടങ്ങള്‍ പതിവാണ്. മാങ്കൂട്ടം വഴിയുളള പുവാര്‍ ബസ്, കാഞ്ഞിരംകുളം, നെയ്യാറ്റിന്‍കര, വിഴിഞ്ഞം ബസുകള്‍ ഏറെ ബുദ്ധിമുട്ടിയാണ് ഇതുവഴി കടന്നു പോകുന്നത്. അനധികൃത ചന്ത അംഗീകൃത ചന്തയിലേയ്ക്ക് മാറ്റണമെന്ന ആവശ്യം ശക്തമാവുകയാണ്. റസിഡന്‍സ് അസോസിയേഷനുകള്‍ പഞ്ചായത്തിനും പൊലിസിനും പരാതി നല്‍കിയെങ്കിലും നടപടിയൊന്നുമുണ്ടായിട്ടില്ല.