ഹൈദരാബാദ്: രാജ്യ ശ്രദ്ധ നേടിയ പ്രചാരണങ്ങള്‍ക്കൊടുവില്‍ ഹൈദരാബാദ് മുനിസിപ്പല്‍ കോര്‍പറേഷന്‍ തെരഞ്ഞെടുപ്പ് വോട്ടെടുപ്പ് തുടങ്ങി. രാവിലെ ഏഴുമണിക്കാണ് വോട്ടെടുപ്പ് ആരംഭിച്ചത്.

നഗരസഭയുടെ 150 വാര്‍ഡുകളിലായി 1122 സ്ഥാനാര്‍ത്ഥികളാണ് മത്സരിക്കുന്നത്. 24 അസംബ്ലി മണ്ഡലങ്ങള്‍ ചേരുന്നതാണ് നഗരസഭാ പ്രദേശം. നഗരത്തില്‍ 74.67 ലക്ഷം വോട്ടര്‍മാര്‍ ഉണ്ട്.

കനത്ത സുരക്ഷയിലാണ് വോട്ടെടുപ്പ് നടക്കുന്നത്. പൊലിസുകാരുടെ വന്‍സംഘത്തെയാണ് നഗരത്തില്‍ വിന്യസിച്ചിരിക്കുന്നത്. ഡിസംബര്‍ നാലിനാണ് വോട്ടെണ്ണലും ഫലപ്രഖ്യാപനവും.

ബി.ജെ.പി കോര്‍പറേഷന്‍ ഭരണം പിടിക്കാന്‍ നടത്തിയ പ്രചാരണമാണ് തെരഞ്ഞെടുപ്പിനെ ദേശീയ ശ്രദ്ധയില്‍ എത്തിച്ചത്. അധ്യക്ഷന്‍ ജെ പി നദ്ദ, കേന്ദ്ര ആഭ്യന്തര മന്ത്രി അമിത് ഷാ, തുടങ്ങി ദേശീയ നേതാക്കളെ രംഗത്തിറക്കിയായിരുന്നു ബി.ജെ.പിയുടെ പ്രചാരണം.