കുന്നംകുളം: പാറേമ്പാടം വിക്ടറി ബാറിനു സമീപം ഇന്നലെ അര്‍ധരാത്രി യുവാവിന്റെ മരണത്തിനിടയാക്കിയ വാഹനവും ഡ്രൈവറേയും പൊലിസ് പിടികൂടി.
തമിഴ്‌നാട് ഈ റോഡ് ഇളമാത്തൂര് സ്വദേശി പെരിയ്യസ്വാമി മകന്‍ ചന്ദ്രശേഖര(37)നെയാണ് കുന്നംകുളം പൊലിസ് സംഘം പിടികൂടിയത്. പൊലിസ്‌നടത്തിയ അന്വേഷണത്തിനൊടുവിലാണ് വാഹനവും ഡ്രൈവറേയും പിടികൂടിയത്.
അന്വേഷണത്തില്‍ മരിച്ചത് അക്കിക്കാവിലുള്ള സുഭാഷ് എന്ന വ്യക്തിയാണെന്നു മനസിലാവുകയും ഇടിച്ച വാഹനത്തെ കുറിച്ചോ സമയത്തെ കുറിച്ചോ യാതൊരു വിധ വിവരവും ഇല്ലാതെ അന്വേഷണം വഴിമുട്ടിയ അവസ്ഥയില്‍ കുന്നംകുളം എ.സി.പി. സിനോജിന്റെ നിര്‍ദേശാനുസരണം എസ്.എച്ച് ഓ കെ.ജി സുരേഷിന്റെ നേതൃത്വത്തില്‍ പല സംഘങ്ങളായി തിരിഞ്ഞ് സമീപത്തുള്ള മുഴുവന്‍ സി.സി.ടി.വി വീഡിയോ ദൃശ്യങ്ങള്‍ പരിശോധിക്കുകയും സ്ഥലത്തെ ഫോണ്‍ വിളികളുടെ വിശദാംശങ്ങള്‍ മുതലായവ ശേഖരിക്കുകയും ചെയ്യ്തു.
സി.സി.ടി.വി പരിശോധനയില്‍ വാഹനത്തിന്റെ ചില രൂപങ്ങള്‍ മനസിലാക്കി.
തുടര്‍ന്ന് നടത്തിയ അന്വേഷണത്തില്‍ കുന്നംകുളം അയ്യപ്പത്ത് റോഡിലെ ദേശായി ബ്രദേഴ്‌സിന്റെ പേപ്പര്‍ ഗോഡൗണില്‍ ഇന്ന് പുലര്‍ച്ചെ ഇറക്കാനുള്ള പേപ്പര്‍ ലോഡുമായി തമിഴ്‌നാട്ടിലെ കരൂര്‍ എന്ന സ്ഥലത്തുള്ള ടി.എന്‍.പി.എല്‍. എന്ന സ്ഥാപനത്തില്‍ നിന്നും എത്തേണ്ട ലോഡ് ഇതുവരെ എത്തിയിട്ടില്ലെന്ന് മനസിലായത്.
ഈ വാഹനത്തിന്റെ ഡ്രൈവറുടെ മൊബൈല്‍ ലൊക്കേഷനെ കുറിച്ച് നടത്തിയ അന്വേഷണത്തില്‍ കുന്നംകുളം തൃശ്ശൂര്‍ റോഡിലെ ചൂണ്ടലില്‍ ഉള്ള ലോറിയുമായി സാദൃശ്യം തോന്നുകയും വാഹനം ശാസ്ത്രീയമായി പരിശോധന നടത്തുകയും ഡ്രൈവറെ ചോദ്യംചെയ്യുകയും ചെയ്തു.
തുടര്‍ന്ന് ചോദ്യം ചെയ്യലില്‍ ഡ്രൈവര്‍ കുറ്റം സമ്മതിക്കുകയും ചെയ്തു. അന്വേഷണസംഘത്തില്‍ എസ് ഐ യു.കെ ഷാജഹാന്‍ എ.എസ്.ഐമാരായ സുരേന്ദ്രന്‍, ജോയി , സി.പി.ഒമാരായ ആശിഷ്, മെല്‍വിന്‍ സുമേഷ് എന്നിവരുണ്ടായിരുന്നു.