മനാമ: സഊദി അറേബ്യയുള്‍പ്പെടെ വിവിധ ഗള്‍ഫ് രാഷ്ട്രങ്ങളില്‍ നിരവധി ബ്രാഞ്ചുകളും സഹോദര സ്ഥാപനങ്ങളുമായി വ്യാപിച്ചു കിടക്കുന്ന ബിസിനസ് സംരംഭമായ 'ദുബൈ പ്ലാസ' ബഹ്‌റൈനിലുമെത്തുന്നു.

ബഹ്‌റൈനിലെ പ്രഥമ ദുബൈ പ്ലാസ ഡിപ്പാര്‍ട്ട്‌മെന്റ് സ്റ്റോര്‍ ലോകോത്തര നിലവാരമുള്ള ഉല്പന്നങ്ങളുമായി ബുധനാഴ്ച വൈകിട്ട് അഞ്ചു മണിക്ക് മനാമയില്‍ പ്രവര്‍ത്തനമാരംഭിക്കുമെന്ന് മാനേജ്‌മെന്റ് പ്രതിനിധികള്‍ വാര്‍ത്താസമ്മേളനത്തില്‍ അറിയിച്ചു.

മുന്‍ ബഹ്‌റൈന്‍ എം.പി അഹ്മദ് അബ്ദുല്‍ വാഹിദ് അല്‍ ഖറാത്ത സ്ഥാപനം ഉദ്ഘാടനം ചെയ്യും. കൂടാതെ സമസ്ത ബഹ്‌റൈന്‍ പ്രസിഡന്റ് സയ്യിദ് ഫഖ്‌റുദ്ധീന്‍ കോയ തങ്ങള്‍ ചടങ്ങില്‍ പങ്കെടുക്കും.

മനാമ ഫിഷ് റൗണ്ട് (ഐക്യുറ പാര്‍ക്ക്) പരിസരത്തെ അദാരിഹോട്ടല്‍സൈന്‍ ഓഫീസിനു സമീപം വിപുലമായ സൗകര്യങ്ങളോടു കൂടിയാണ് സ്ഥാപനം തയ്യാറാക്കിയിരിക്കുന്നതെന്നും ഭക്ഷ്യ-വസ്ത്ര ഉല്പന്നങ്ങളൊഴികെ എല്ലാം ഇവിടെ ലഭ്യമായിരിക്കും.

ഗള്‍ഫ് രാഷ്ട്രങ്ങളിലും സ്വദേശത്തും ബിസിനസ്സില്‍ കഴിവു തെളിയിച്ച ഒരു കൂട്ടം നിക്ഷേപകരുടെ സംരംഭമാണ് ദുബൈ പ്ലാസ. ഇതിന് സൗദി അറേബ്യയില്‍ മാത്രം 12 ഡിപ്പാര്ട്ട്‌മെന്റ്് ഷോപ്പുകള്‍ ഉണ്ട്. ഇവക്കു പുറമേ ജി.സി.സി. രാഷ്ട്രങ്ങളിലും സഹോദര സ്ഥാപനങ്ങള്‍ നടന്നുവരുന്നുണ്ട്. വ്യവസായ രംഗത്ത് ഒന്നര നൂറ്റാണ്ടിന്റെ പ്രവൃത്തി പരിചയവുമായാണ് ദുബൈ പ്ലാസ ഗ്രൂപ്പ് ബഹ്‌റൈനിലെത്തുന്നതെന്നും മാനേജ്‌മെന്റ് അറിയിച്ചു. മനാമക്കു പുറമെ ബഹ്‌റൈനിലെ വിവിധ സ്ഥലങ്ങളിലും ഉടന്‍ ബ്രാഞ്ചുകള്‍ ആരംഭിക്കുമെന്നും ഇവര്‍ അറിയിച്ചു.

വാര്‍ത്താ സമ്മേളനത്തില്‍ മാനേജിംഗ് ഡയറക്ടര്‍ കിഴിശ്ശേരി മുഹമ്മദ് അഷ്‌റഫ്, ഡയറക്ടര്‍മാരായ അഷ്‌റഫ് മായഞ്ചേരി (സ്‌കൈ ഗ്രൂപ്പ്), നൗഷാദ് അലി അബ്ദുള്ള (സ്‌കൈ ഗ്രൂപ്പ്), മാനേജര്‍ കിഴിശ്ശേരി ജിഷാര്‍ എന്നിവരും പങ്കെടുത്തു.