കല്‍പ്പറ്റ: വര്‍ത്തമാന കാലത്ത് സാമൂഹിക രാഷ്ട്രീയ പ്രവര്‍ത്തനങ്ങള്‍ക്ക് യുവാക്കള്‍ സി.എച്ചിനെ മാതൃകയാക്കണമെന്ന് മുനവ്വറലി ശിഹാബ് തങ്ങള്‍.
എഴുത്തുകാരന്‍, വാഗ്മി, പത്രപ്രവര്‍ത്തകന്‍, ഭരണാധികാരി, മികച്ച പാര്‍ലമെന്റേറിയന്‍ തുടങ്ങി കൈവെച്ച മേഖലകളിലൊക്കെ വ്യക്തി മുദ്ര പതിപ്പിച്ച കേരള രാഷ്ട്രീയത്തിലെ അപൂര്‍വം ചില വ്യക്തികളില്‍ ഒരാളായിരുന്നു സി.എച്ച് എന്നും അദ്ദേഹം അനുസ്മരിച്ചു. നിയോജക മണ്ഡലം യൂത്ത് ലീഗ് കമ്മിറ്റി നടത്തിയ സി.എച്ച് അനുസ്മരണവും എന്റോവ്‌മെന്റ് വിതരണവും ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. നിയോജക മണ്ഡലം പ്രസിഡന്റ് കെയംതൊടി മുജീബ് അധ്യക്ഷനായി. ലീഗ് സംസ്ഥാന സെക്രട്ടറി പി.എം സാദിഖലി അനുസ്മരണ പ്രഭാഷണം നടത്തി. ചടങ്ങില്‍ ആതുര സേവന മേഖലയിലെ മികച്ച പ്രവര്‍ത്തനം നടത്തിവരുന്ന കല്‍പ്പറ്റ ശാന്തി പെയ്ന്‍ ആന്‍ഡ് പാലിയേറ്റീവ് കെയര്‍ സെക്രട്ടറി ഗഫൂര്‍ താനേരിക്ക് സി.എച്ച് എന്റോവ്‌മെന്റ് നല്‍കി ആദരിച്ചു. കോളജ് തെരഞ്ഞെടുപ്പില്‍ വിജയിച്ച എം.എസ്.എഫ് സാരഥികള്‍ക്ക് ചടങ്ങില്‍ സ്വീകരണം നല്‍കി. ജില്ലാ ലീഗ് സെക്രട്ടറി കെ.കെ അഹമ്മദ് ഹാജി, സംസ്ഥാന യൂത്ത് ലീഗ് വൈസ് പ്രസിഡന്റ് പി. ഇസ്മായില്‍, എം.എസ്.എഫ് സംസ്ഥാന ജന സെക്രട്ടറി എം.പി നവാസ്, യൂത്ത് ലീഗ് ജില്ലാ പ്രസിഡന്റ് കെ. ഹാരിസ് സംസാരിച്ചു.
സുല്‍ത്താന്‍ ബത്തേരി മണ്ഡലം യൂത്ത് ലീഗ് കമ്മിറ്റി ടൗണ്‍ ഹാളില്‍ സംഘടിപ്പിച്ച സി.എച്ച് അനുസ്മരണം മുസ്്‌ലിം ലീഗ് ജില്ലാ പ്രസിഡന്റ് പി.പി.എ കരീം ഉദ്ഘാടനം ചെയ്തു. മണ്ഡലം ലീഗ് പ്രസിഡന്റ് പി.പി അയ്യൂബ് അധ്യക്ഷനായി.