കോഴിക്കോട്: ശബരിമലയിലെ സ്ത്രീ പ്രവേശനവുമായി ബന്ധപ്പെട്ട സുപ്രിംകോടതി വിധി നടപ്പാക്കുമെന്ന് മന്ത്രി ജി. സുധാകരന്‍.

ശബരിമല സുപ്രിംകോടതി വിധി ഭരണഘടന അടിസ്ഥാനമാക്കിയാണ്. ഭരണഘടനയില്‍ പറയുന്ന അവസരസമത്വമാണ് അതിന്റെ അടിസ്ഥാനം. ഇത്തരം വിധി നേരത്തെ തന്നെ വരേണ്ടതായിരുന്നു. സ്ത്രീകള്‍ ശബരിമലയില്‍ വരുന്നതിനാല്‍ അവിടെ ആവശ്യമായ സൗകര്യങ്ങള്‍ ഒരുക്കും. സൗകര്യങ്ങള്‍ ഒരുക്കാമെന്ന് ദേവസ്വംബോര്‍ഡ് പ്രസിഡന്റ് അറിയിച്ചിട്ടുണ്ടെന്നും മാധ്യമങ്ങളോട് സംസാരിക്കവെ അദ്ദേഹം പറഞ്ഞു.

സ്ത്രീ തീര്‍ഥാടനത്തിന് ആവശ്യമായ സൗകര്യങ്ങളാണ് ഒരുക്കുക. സ്ത്രീ സമത്വത്തിന് വേണ്ടിയുള്ള പരാതി പോയത് കുറേ കാലം മുന്‍പാണ്. എന്നാല്‍ കോടതി ഉചിതമായ തീരുമാനമെടുത്തു. രാജ്യത്തിന് അഭിമാനമാണ് ആ വിധി. മുത്തലാഖും ഇതുമായി ബന്ധമില്ല, സാമ്യമില്ല. മൗലികാവകാശം അംഗീകരിച്ചുകൊടുക്കുകയാണ് ചെയ്തത്. വിധി നടപ്പാക്കുമെന്ന് തിരുവിതാംകൂര്‍ ദേവസ്വംബോര്‍ഡ് പ്രസിഡന്റു തന്നെ അറിയിച്ചിട്ടുണ്ട്.

സുപ്രിംകോടതി ഒരു കാര്യം പറഞ്ഞാല്‍ അത് കൂടുതല്‍ നടപ്പാക്കേണ്ട കാര്യമില്ല. അവിടെ സ്ത്രീകള്‍ക്ക് കയറാം. ആവശ്യമുള്ളവര്‍ക്ക് കയറാം. ആരും നിര്‍ബന്ധിപ്പിച്ച് കയറ്റില്ല. അവരവരുടെ മനസ്സാക്ഷിക്ക് അനുസരിച്ച് വേണ്ടവര്‍ക്ക് കയറാം. അതിനുള്ള ചട്ടമുണ്ടാക്കിവെക്കലാണ് ദേവസ്വംബോര്‍ഡ് ചെയ്യേണ്ടത്. സ്ത്രീകള്‍ അയ്യപ്പന്റെ നൈഷ്ഠിക ബ്രഹ്മചര്യം ലംഘിക്കാനല്ല പോകുന്നത്.

സ്ത്രീകള്‍ പ്രാര്‍ഥിക്കുന്നതിനാണ് പോകുന്നത്. അവിടെ ചെന്നാല്‍ മറ്റുചിന്തകളൊന്നും ഉണ്ടാവില്ല. ഇന്നുവരെ ചിന്തിച്ച ചരിത്രമില്ല. 50 വയസ്സു കഴിഞ്ഞാല്‍ ഉടനെ സ്ത്രീത്വമില്ലാതാവില്ല. നാല്‍പ്പത്തി ഒമ്പതര വയസ്സും 50 വയസ്സും തമ്മില്‍ വ്യത്യാസമില്ല. 50 വയസ്സുള്ളവര്‍ പോയിട്ട് അവിടൊന്നും സംഭവിച്ചിട്ടില്ല. അതുപോലെതന്നെയാണ് മറ്റുള്ളവരും.

എല്ലാവരും പോകുന്ന ദേവാലയമാണ് ശബരിമല. ജാതിമത വ്യത്യാസമില്ല. കേരളം ശബരിമലയെക്കുറിച്ച് അഭിമാനിക്കണം. സെക്കുലര്‍ സംസ്‌കാരത്തിന്റെ പൂര്‍വ്വകാമിയാണ് ശബരിമല ക്ഷേത്രം. അവിടെ എല്ലാവരും സ്വാമിമാരാണ്.

പരസ്പരം അങ്ങനെയാണ് വിളിക്കുന്നത്. അതിപ്പോള്‍ സ്ത്രീകള്‍ക്കു കൂടി ലഭിച്ചു. സ്ത്രീകളാണ് ഏറ്റവും കൂടുതല്‍ സന്തോഷിക്കുന്നത്. സ്ത്രീകള്‍ക്ക് സുരക്ഷയൊരുക്കും. അവിടെ ആര്‍ക്കും അനാവശ്യമായി ഒന്നും തോന്നുകയില്ല. അവിടുത്തെ അന്തരീക്ഷം നമ്മളില്‍ ചെലുത്തുന്ന വലിയ സ്വാധീനമുണ്ട്. ആ സ്വാധീനം ഭൗതികവാദി ആയാലും ആദ്ധ്യാത്മികവാദി ആയാലും പ്രകൃതിയുടെ ഒരു സ്വാധീനം അവിടെയുണ്ട്. വിശ്വാസമുള്ളതുകൊണ്ടാണ് ദേവസ്വം മന്ത്രിയായി പല തവണ മല കയറിയത്. ഒരു ദിവസം തന്നെ രണ്ടു തവണ മലകയറിയിട്ടുണ്ടെന്നും അദ്ദേഹം പറഞ്ഞു.