തിരുവനന്തപുരം: കോണ്‍ഗ്രസിന്റെ ആഭ്യന്തര പ്രശ്‌നങ്ങളില്‍ തലയിടാതെ സി.പി.എമ്മിന്റെ അതിദയനീയമായ പരാജയത്തിന് അടിയന്തര പരിഹാരം കാണാനാണ് മുഖ്യമന്ത്രി പിണറായി വിജയന്‍ ശ്രമിക്കേണ്ടതെന്ന് കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍.
ഇന്ത്യയിലെ അവസാനത്തെ സി.പി.എം മുഖ്യമന്ത്രിയായി പിണറായി വിജയന്‍ മാറും. സി.പി.എമ്മിന്റെ അന്ത്യകര്‍മങ്ങള്‍ക്ക് നേതൃത്വം നല്‍കുന്ന നേതാവാണ് അദ്ദേഹം.
കോണ്‍ഗ്രസിനെ നന്നാക്കാനും രക്ഷിക്കാനുമുള്ള പിണറായി വിജയന്റെ ഒറ്റമൂലി കോണ്‍ഗ്രസിന് ആവശ്യമില്ല. ദേശീയരാഷ്ട്രീയത്തില്‍ ബി.ജെ.പിക്കെതിരേ ജനാധിപത്യ മതേതരശക്തികളുടെ മുന്നണിക്ക് നേതൃത്വം നല്‍കിയ രാഹുല്‍ ഗാന്ധിയുടെ ശ്രമങ്ങളെ തുടക്കംമുതല്‍ പരാജയപ്പെടുത്താന്‍ ശ്രമിച്ച നേതാവാണ് പിണറായി.
പശ്ചിമബംഗാളിലും ത്രിപുരയിലും ഇന്ത്യയുടെ ഇതരഭാഗങ്ങളിലും സി.പി.എമ്മിന് ചരിത്രത്തിലെ ഏറ്റവും കനത്ത തിരിച്ചടി എങ്ങനെ സംഭവിച്ചുവെന്നതിനെക്കുറിച്ച് ആത്മാര്‍ഥമായ വിശകലനവും സത്യസന്ധമായ വിലയിരുത്തലുമാണ് സി.പി.എം നടത്തേണ്ടത്. അത്തരമൊരു ശ്രമം സി.പി.എം ഇതുവരെ നടത്തിയിട്ടില്ല.
ബി.ജെ.പിയുടെ ഫാസിസ്റ്റ് സര്‍ക്കാരിനെതിരേ ശക്തമായ നിലപാടും ഇടപെടലും നടത്തിക്കൊണ്ട് മുന്നോട്ടുപോകുന്ന രാഷ്ട്രീയ പ്രസ്ഥാനം കോണ്‍ഗ്രസാണ്. ഇക്കാര്യം മുഖ്യമന്ത്രി ഓര്‍ക്കുന്നത് നന്നായിരിക്കും. മുങ്ങിത്താഴുന്ന കപ്പലാണ് സി.പി.എം. അതിനെ രക്ഷിക്കാന്‍ പിണറായി വിജയന് കഴിയില്ലെന്നും അദ്ദേഹം പറഞ്ഞു.