ആനക്കര: പഴയ തലമുറയില്‍പ്പെട്ട അധ്യാപകര്‍ക്ക് കിട്ടിയിരുന്നത് പോലെയുള്ള ആദരവ് പുതിയ തലമുറയില്‍പ്പെട്ട അധ്യാപകര്‍ക്ക് കിട്ടുന്നുണ്ടോ എന്ന സംശയം ചിലര്‍ക്കെങ്കിലും ഉണ്ടാകാം. എന്നാല്‍ അന്നത്തെ അധ്യാപകര്‍ കാണിച്ചിരുന്നതു പോലെ നാടിനോടും സമൂഹത്തോടും കടപ്പാട് പ്രകടിപ്പിച്ചാല്‍ തീര്‍ച്ചയായും അവര്‍ക്ക് ലഭിച്ചിരുന്നത് പോലെയുള്ള ആദരവും അംഗീകാരവും ഇന്നത്തെ അധ്യാപകര്‍ക്കും ലഭിക്കുമെന്ന് ഉന്നത വിദ്യഭ്യാസ മന്ത്രി ഡോ.കെ.ടി ജലീല്‍ പറഞ്ഞു. മികച്ച അധ്യാപകനുള്ള സംസ്ഥാന അവാര്‍ഡ് നേടിയ കുമരനെല്ലൂര്‍ ഗവന്മെന്റ് ഹയര്‍ സെക്കന്‍ഡറി സ്‌കൂളിലെ പ്രധാന അധ്യാപകന്‍ എന്‍ രാജന് കുമരനെല്ലുര്‍ പൗരാവലി നല്‍കിയ സ്വീകരണം ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. പഞ്ചായത്ത് പ്രസിഡണ്ട് സിന്ധു മാവറ അധ്യക്ഷയായി. കവി അക്കിത്തം, കവി ആലങ്കോട് ലീലാകൃഷ്ണന്‍, രാമകൃഷ്ണന്‍ കുമരനെല്ലൂര്‍, ഡോ. ഇ.എം സൂരജ, ഡോ. നിവേദിത, ജില്ലാപഞ്ചായത്ത് അംഗം ടി അബ്ദുള്‍ കരീം, ബ്ലോക്ക് പഞ്ചായത്തംഗം ടി.കെ സുനിത, കെ മൂസക്കുട്ടി സംസാരിച്ചു.