ലക്‌നൗ: കൊവിഡ് വ്യാപനം ആരോപിച്ച് അറസ്റ്റ് ചെയ്ത തബ്‌ലീഗ് പ്രവര്‍ത്തകനെതിരേ വധശ്രമം അടക്കമുള്ള വകുപ്പുകള്‍ ചുമത്തിയ യു.പി സര്‍ക്കാരിനെ രൂക്ഷമായി വിമര്‍ശിച്ച് അലഹബാദ് ഹൈക്കോടതി. സര്‍ക്കാരിന്റെയും പൊലിസിന്റെയും നടപടിയെ അധികാര ദുര്‍വിനിയോഗമെന്നു വിശേഷിപ്പിച്ച കോടതി, കേസ് ഈ മാസം 15നു വീണ്ടും പരിഗണിക്കുമ്പോള്‍, മാറ്റം വരുത്തിയ എഫ്.ഐ.ആര്‍ ഹാജരാക്കണമെന്നും നിര്‍ദേശിച്ചു.
മുഹമ്മദ് സആദ് എന്നയാള്‍ക്കെതിരേ രജിസ്റ്റര്‍ ചെയ്ത കേസിലായിരുന്നു സര്‍ക്കാരിന് ഹൈക്കോടതിയുടെ രൂക്ഷ വിമര്‍ശനം. എന്തുകൊണ്ടാണ് സആദിനെതിരേ വധശ്രമം അടക്കമുള്ള വകുപ്പുകള്‍ ചുമത്തിയതെന്നതില്‍ സത്യവാങ്മൂലം സമര്‍പ്പിക്കാനും അന്വേഷണോദ്യോഗസ്ഥനോട് ജസ്റ്റിസ് അജയ് ഭാനോട്ട് നിര്‍ദേശിച്ചു. പത്തു ദിവസത്തിനുള്ളില്‍ മറുപടി നല്‍കാന്‍ സര്‍ക്കാരിനോടും ആവശ്യപ്പെട്ടിട്ടുണ്ട്.