കോഴിക്കോട്: പനി ബാധിച്ച് മെഡിക്കല്‍ കോളജില്‍ നിന്ന് മരിച്ചയാള്‍ക്ക് നിപായല്ലെന്ന് സ്ഥിരീകരണം. മണിപ്പാല്‍ വൈറോളജി ഇന്‍സ്റ്റിറ്റ്യൂട്ടില്‍ നിന്ന് ലഭിച്ച റിസല്‍ട്ടിന്റെ അടിസ്ഥാനത്തില്‍ മരണകാരണം എച്ച് 1 എന്‍ 1 പോസിറ്റീവാണെന്ന് ജില്ലാ മെഡിക്കല്‍ ഓഫിസര്‍ വാര്‍ത്താകുറിപ്പില്‍ അറിയിച്ചു. ഇതോടെ രാവിലെ മുതല്‍ നിലനിന്നിരുന്ന അഭ്യൂഹങ്ങള്‍ക്ക് വിരാമമായി.
കഴിഞ്ഞ ദിവസമാണ് മേപ്പയ്യൂര്‍ സ്വദേശി പനി ബാധിച്ച് മരിച്ചത്. കൂടാതെ മരിച്ചയാളുടെ വീട്ടിലെ രണ്ട് പേര്‍ക്കും പനി ബാധിച്ചതോടെയാണ് നിപായാണെന്ന അഭ്യൂഹം സമൂഹമാധ്യമങ്ങളില്‍ പ്രചരിച്ചത്. ഇതോടെ മെഡിക്കല്‍ കോളജിലും ജാഗ്രതാ നിര്‍ദേശം നല്‍കിയിരുന്നു. ഇതിന്റെ അടിസ്ഥാനത്തില്‍ പനി ബാധിച്ചവരെ ഐസോലേഷന്‍ വാര്‍ഡിലേക്ക് മാറ്റുകയും ചെയ്തു. മരിച്ചയാളുടെ വീട്ടിലെ പനി ബാധിച്ച രണ്ടു പേരുടെയും മരിച്ചയാളുടെയും സാമ്പിളുകള്‍ രോഗകാരണം കണ്ടെത്താന്‍ മണിപ്പാല്‍ വൈറോളജി ഇന്‍സ്റ്റിറ്റ്യൂട്ടിലേക്ക് അയച്ചിട്ടുണ്ട്. ഇക്കാര്യത്തില്‍ ഒരു സ്ഥിരീകരണവും ഉണ്ടായിട്ടില്ല. എച് 1 എന്‍1 ആണെന്നാണ് പ്രാഥമിക റിപ്പോര്‍ട്ട്. സമൂഹ മാധ്യമങ്ങളിലും മറ്റും പ്രചരിക്കുന്നത് അടിസ്ഥാന രഹിതമായ വാര്‍ത്തയാണെന്നും ജനങ്ങള്‍ ആശങ്കപ്പെടേണ്ടതില്ലെന്നും ജില്ലാ മെഡിക്കല്‍ ഓഫിസര്‍ ഡോ. വി. ജയശ്രീ അറിയിച്ചു.