കുന്ദമംഗലം: ചാത്തമംഗലം കള്ളുഷാപ്പിനു സമീപം നാലംഗ സംഘം ഹോട്ടല്‍ അടിച്ചുതകര്‍ത്ത് ഉടമയെ തല്ലിപ്പരുക്കേല്‍പ്പിച്ചു. ഇന്നലെ രാവിലെ ആറിനാണു സംഭവം.
ഇരുമ്പു പൈപ്പുമായെത്തിയ സംഘം പ്രദേശത്തെ ന്യൂ ഫ്രണ്ട്‌സ് ഹോട്ടലിലെ ഗ്ലാസ് തകര്‍ത്ത് ഉടമ കുറുവച്ചാലില്‍ ഗോകുല്‍ദാസിനെ തല്ലുകയായിരുന്നു. കഴിഞ്ഞ ദിവസം വാഹനത്തില്‍ കയറുന്നതു സംബന്ധിച്ചു പ്രദേശത്തു നടന്ന വഴക്കില്‍ ഗോകുല്‍ദാസ് ഇടപ്പെട്ടിരുന്നു. ഇതിന്റെ വൈരാഗ്യമാണ് അക്രമത്തിനു കാരണമെന്നു സംശയിക്കുന്നു.
കുന്ദമംഗലം പൊലിസ് പ്രതികള്‍ക്കായി അന്വേഷണം ഊര്‍ജിതമാക്കി. പ്രതികളെ കുറിച്ചു സൂചന ലഭിച്ചതായി പൊലിസ് പറഞ്ഞു. സംഭവത്തില്‍ പ്രതിഷേധിച്ച് ചാത്തമംഗലത്ത് ഇന്നലെ വൈകിട്ടു നാലു മുതല്‍ ആറുവരെ ഹര്‍ത്താലാചരിച്ചു.