മലപ്പുറം: തദ്ദേശ തെരഞ്ഞെടുപ്പില്‍ സ്വതന്ത്ര സ്ഥാനാര്‍ഥിയായി മത്സരിക്കുന്നയാള്‍ വോട്ടര്‍മാരെ പണം നല്‍കി സ്വാധീനിക്കാന്‍ ശ്രമിച്ചതായി പരാതി.മലപ്പുറം കൊണ്ടോട്ടി നഗരസഭയിലെ 28ാം വാര്‍ഡിലെ സ്വതന്ത്ര സ്ഥാനാര്‍ഥി താജുദ്ദീനെതിരെയാണ് ആരോപണം. പണം വിതരണം ചെയ്യുന്നതിന്റെ ദൃശ്യങ്ങള്‍ പുറത്തുവന്നു.

സംഭവത്തില്‍ പരാതി ലഭിച്ചെന്ന് കൊണ്ടോട്ടി നഗരസഭ തെരഞ്ഞെടുപ്പ് റിട്ടേണിംഗ് ഓഫീസര്‍ ഇംതിയാസ് പറഞ്ഞു. പരാതി ജില്ലാ ഇലക്ഷന്‍ ഓഫീസര്‍ക്ക് കൈമാറിയെന്നും റിട്ടേണിംഗ് ഓഫീസര്‍ അറിയിച്ചു. ഇയാള്‍ പണം കൈമാറാന്‍ ശ്രമിച്ച വോട്ടര്‍ തന്നെയാണ് ഇതിന്റെ ദൃശ്യങ്ങള്‍ പകര്‍ത്തിയിരിക്കുന്നത്. വോട്ടു ചെയ്യുന്നതുമായി ബന്ധപ്പെട്ട കാര്യം സംസാരിച്ച ശേഷമാണ് സ്ഥാനാര്‍ഥി പോക്കറ്റില്‍ നിന്നും പണമെടുത്ത് വോട്ടര്‍ക്ക് നേരെ നീട്ടുന്നത്.