അമ്പലവയല്‍: അമ്പലവയല്‍ ടൗണിലെ  റോഡരികില്‍ മാലിന്യം തള്ളുന്നതിനായി നിര്‍മിച്ച റിങ് എടുത്ത് മാറ്റി. ജെ.സി.ബി ഉപയോഗിച്ച് മാലിന്യങ്ങള്‍ പൂര്‍ണമായും നീക്കം ചെയ്തു. പകര്‍ച്ച വ്യാധികള്‍ തടയാന്‍ മുന്‍ കരുതലില്ലാതെ അമ്പലവയല്‍ ഗ്രാമ പഞ്ചായത്തിന്റെ നടപടി പ്രധിഷേധത്തിനിടയാക്കുന്നുണ്ടെന്ന് കഴിഞ്ഞ 19ന് സുപ്രഭാതം വാര്‍ത്ത നല്‍കിയിരുന്നു. മാലിന്യങ്ങള്‍ നീക്കം ചെയ്യാതെ വഴിയാത്രക്കാര്‍ക്കും വിദ്യാര്‍ഥികള്‍ക്കും കച്ചവടക്കാര്‍ക്കും ദുരിതമായിരുന്ന മാലിന്യക്കൂമ്പാരമാണ് ഇതോടെ ഇവിടെ നിന്നും ഒഴിവാക്കിയത്. മാലിന്യ സംസ്‌കരണവുമായി ബന്ധപ്പെട്ട് അവാര്‍ഡുകള്‍ കരസ്ഥമാക്കിയ പഞ്ചായത്തില്‍ മാലിന്യങ്ങള്‍ നീക്കം ചെയ്യാതെ റോഡില്‍ കുമിഞ്ഞു കൂടാന്‍ ഇടയാക്കിയത് പ്രതിഷേധത്തിന് ഇടയാക്കിയിരുന്നു. രാത്രിയായാല്‍ തെരുവ് നായകള്‍ മാലിന്യങ്ങള്‍ കടിച്ചെടുത്ത് കച്ചവട സ്ഥാപനങ്ങള്‍ക്ക് മുന്നില്‍ കൊണ്ടിടുന്നതിനാല്‍ കടയുടമകള്‍ പഞ്ചായത്തിന് പരാതി നല്‍കിയിരുന്നു. എന്നാല്‍ നടപടിയുണ്ടായിരുന്നില്ല. ഇവിടങ്ങളില്‍ മാലിന്യങ്ങള്‍ പൂര്‍ണമായും നീക്കം ചെയ്‌തെങ്കിലും മാലിന്യം തള്ളുന്നവര്‍ക്കെതിരെ കര്‍ശന നടപടി വേണമെന്നുമാണ് നാട്ടുകാരുടെ ആവശ്യം.