തിരുവനന്തപുരം: തദ്ദേശ തെരഞ്ഞെടുപ്പില്‍ ഇടതുപക്ഷ ജനാധിപത്യ മുന്നണി ശക്തമായ മുന്നേറ്റം നടത്തുമെന്ന് മുഖ്യമന്ത്രി പിണറായി വിജയന്‍. സംഘടിതമായ അപവാദ പ്രചാരണങ്ങളെയും വളഞ്ഞിട്ടുള്ള ആക്രമണത്തെയും മറികടന്ന് സര്‍ക്കാരിന് ജനക്ഷേമ നടപടികളുമായി മുന്നോട്ടു പോകാന്‍ കഴിയുന്നത് ജനങ്ങളുടെ അകമഴിഞ്ഞ പിന്തുണ കൊണ്ടാണ്.
ആ പിന്തുണയും ജനങ്ങളുടെ വിശ്വാസവും സംരക്ഷിക്കാന്‍ എന്തു ത്യാഗം അനുഭവിച്ചും മുന്നോട്ട് പോകുമെന്ന ഉറപ്പാണ് നല്‍കാനുള്ളതെന്നും മുഖ്യമന്ത്രി പറഞ്ഞു. തദ്ദേശ തെരഞ്ഞെടുപ്പില്‍ പ്രചാരണ യോഗങ്ങളില്‍ പങ്കെടുക്കാതിരുന്നത് സംബന്ധിച്ചും മുഖ്യമന്ത്രി വിശദീകരിച്ചു.
കൊവിഡ് മാനദണ്ഡങ്ങള്‍ പാലിക്കുന്നതിനാണ് ആള്‍ക്കൂട്ടമുണ്ടാകുന്ന യോഗങ്ങളില്‍ പങ്കെടുക്കാതിരുന്നതെന്ന് മുഖ്യമന്ത്രി പറഞ്ഞു. അതിലും നല്ലത് ഓണ്‍ലൈന്‍ യോഗങ്ങളാണ്. ഇതിനിടയില്‍ താന്‍ പല ഓണ്‍ലൈന്‍ യോഗങ്ങളിലും പങ്കെടുത്തുവെന്നും താന്‍ ജനങ്ങളില്‍ നിന്ന് വിട്ടു പോകുകയോ ജനം തന്നില്‍ നിന്ന് അകന്നു പോകുകയോ ഉണ്ടായിട്ടില്ലെന്നും മുഖ്യമന്ത്രി പറഞ്ഞു.