ന്യൂഡല്‍ഹി: ഉപഭോക്താക്കളുടെ മൊബൈല്‍ നമ്പറുമായി ആധാര്‍ ബന്ധിപ്പിക്കുന്നത് നിര്‍ത്തലാക്കാനുള്ള പദ്ധതികള്‍ സംബന്ധിച്ച വിവരങ്ങള്‍ സമര്‍പ്പിക്കാന്‍ ടെലികോം കമ്പനികള്‍ക്ക് നിര്‍ദേശം. 

15 ദിവസത്തിനകം ഇതുസംബന്ധിച്ച വിവരങ്ങള്‍ സമര്‍പ്പിക്കണമെന്നാണ് യു.ഐ.ഡി.എ.ഐ (യുനീക്ക് ഐഡന്റിഫിക്കേഷന്‍ അതോറിറ്റി ഓഫ് ഇന്ത്യ) നിര്‍ദേശം നല്‍കിയത്.
ടെലികോം സേവനങ്ങള്‍ക്ക് ഉപഭോക്താക്കളുടെ ആധാര്‍ വിവരങ്ങള്‍ മൊബൈല്‍ നമ്പറുമായി ബന്ധിപ്പിക്കേണ്ടതില്ലെന്ന സുപ്രിം കോടതിയുടെ നിര്‍ദേശത്തെ തുടര്‍ന്നാണ് യു.ഐ.ഡി.എ.ഐയുടെ തീരുമാനം.
ഒക്ടോബര്‍ 15ന് മുന്‍പ് ഇതുസംബന്ധിച്ച ആക്ഷന്‍ പ്ലാന്‍ അല്ലെങ്കില്‍ എക്‌സിറ്റ് പ്ലാന്‍ ലഭ്യമാക്കണമെന്നാണ് അറിയിച്ചിട്ടുള്ളത്.
എയര്‍ടെല്‍, ജിയോ, വൊഡാഫോണ്‍-ഐഡിയ, ബി.എസ്.എന്‍.എല്‍ കമ്പനികള്‍ക്ക് ഇക്കാര്യം വ്യക്തമാക്കികൊണ്ടുള്ള ഉത്തരവ് ലഭിച്ചിട്ടുണ്ട്.
ആധാര്‍ അധിഷ്ഠിത സേവനങ്ങള്‍ വേണ്ടതില്ലെന്ന് തീരുമാനിച്ച സാഹചര്യത്തില്‍ മൊബൈല്‍ കണക്ഷനും മറ്റും പഴയരീതി സ്വീകരിച്ചാല്‍ മതിയാകും. ആധാര്‍ വിവരങ്ങള്‍ ശേഖരിച്ചിട്ടുണ്ടെങ്കില്‍ ഉപഭോക്താവിന് ഡി ലിങ്ക് ചെയ്യാനുള്ള സൗകര്യം ഒരുക്കണമെന്നും ഉത്തരവില്‍ വ്യക്തമാക്കുന്നുണ്ട്.
കമ്പനികളില്‍ നിന്ന് ലഭിക്കുന്ന വിവരത്തിന്റെ പശ്ചാത്തലത്തില്‍ തുടര്‍ നടപടികള്‍ സംബന്ധിച്ച് പദ്ധതി തയാറാക്കുമെന്നും യു.ഐ.ഡി.എ.ഐ സി.ഇ.ഒ അജയ് ഭൂഷണ്‍ പറഞ്ഞു.