കോഴിക്കോട്: അതിശക്തമായ മഴക്ക് സാധ്യതയുള്ളതിനാല്‍ കേരളത്തില്‍ ഓറഞ്ച് അലര്‍ട്ട്. പ്രളയത്തിനുശേഷം ഈ മാസം അഞ്ചിന് കേരളത്തില്‍ അതിശക്തമായ മഴക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു. ഇന്നുമുതല്‍ അഞ്ചുവരെ ഇടുക്കിയില്‍ സംസ്ഥാന കാലാവസ്ഥാ നിരീക്ഷണ കേന്ദ്രം യെല്ലോ അലര്‍ട്ട് പ്രഖ്യാപിച്ചിട്ടുണ്ട്.
തെക്കുകിഴക്കന്‍ അറബിക്കടലില്‍ ന്യൂനമര്‍ദം രൂപപ്പെടാനുള്ള സാധ്യത കണക്കിലെടുത്താണ് അതിശക്തമായ മഴയുണ്ടാകുമെന്ന് കാലാവസ്ഥാ വകുപ്പ് പ്രവചിക്കുന്നത്. തെക്കുകിഴക്കന്‍ അറബിക്കടലില്‍ ന്യൂനമര്‍ദം രൂപപ്പെട്ട് ലക്ഷദ്വീപിനെ ലക്ഷ്യം വച്ച് നീങ്ങാനാണ് സാധ്യത. അതിനാല്‍ വെള്ളി, ശനി ദിവസങ്ങളില്‍ ശക്തമായ മഴക്ക് സംസ്ഥാനത്ത് സാധ്യതയുണ്ടെന്ന് സ്വകാര്യ കാലാവസ്ഥാ നിരീക്ഷകര്‍ പറയുന്നു.
വെള്ളിയാഴ്ച ഇടുക്കി, തൃശൂര്‍, പാലക്കാട്, കോഴിക്കോട്, വയനാട് ജില്ലകളിലും അതിശക്തമായ മഴക്ക് സാധ്യതയുണ്ട്. വെള്ളിയാഴ്ച തമിഴ്‌നാട്ടിലും അതിശക്തമായ മഴക്ക് സാധ്യതയുള്ളതിനാല്‍ ഓറഞ്ച് അലര്‍ട്ട് പ്രഖ്യാപിച്ചിട്ടുണ്ട്.
ഏഴുമുതല്‍ തെക്കുകിഴക്ക്, മധ്യ അറബിക്കടലില്‍ മത്സ്യബന്ധം നിരോധിച്ചിട്ടുണ്ട്. പുറംകടലില്‍ മത്സ്യബന്ധനം നടത്തുന്നവര്‍ ശനിയാഴ്ചക്കകം തീരത്ത് തിരിച്ചെത്തണമെന്നും നിര്‍ദേശം നല്‍കിയിട്ടുണ്ട്. അടുത്ത 10 ദിവസത്തേക്ക് കേരളത്തില്‍ മഴ തുടരാനുള്ള സാഹചര്യമാണുള്ളതെന്ന് കാലാവസ്ഥാ നിരീക്ഷകര്‍ പറയുന്നു.