പിണറായി (കണ്ണൂര്‍): തെരഞ്ഞെടുപ്പില്‍ എല്‍.ഡി.എഫ് ഐതിഹാസിക വിജയം നേടുമെന്ന് മുഖ്യമന്ത്രി പിണറായി വിജയന്‍. എല്‍.ഡി.എഫിനെ ക്ഷീണിപ്പിക്കാമെന്നും ഉലച്ചു കളയാമെന്നുമാണു പ്രതിപക്ഷത്തിന്റെ പ്രതീക്ഷ.
പക്ഷേ നാളെ വോട്ടെണ്ണുമ്പോള്‍ മനസിലാകും ആരാണ് ഉലഞ്ഞതെന്നും ആരാണ് ക്ഷീണിച്ചതെന്നും. പിണറായി ചേരിക്കല്‍ ജൂനിയര്‍ ബേസിക് സ്‌കൂള്‍ ബൂത്തില്‍ വോട്ട് ചെയ്തതിനു ശേഷം മാധ്യമങ്ങളോട് പ്രതികരിക്കുകയായിരുന്നു അദ്ദേഹം. ഈ സര്‍ക്കാരിനെതിരേ ഇങ്ങനെയെല്ലാം വിളിച്ചുപറയാമോ എന്ന നിലപാടിലാണു ജനങ്ങള്‍ വോട്ട് ചെയ്യാന്‍ വന്നത്. ജയിക്കാന്‍ സാധ്യതയില്ല എന്നു വിലയിരുത്തിയ ഇടങ്ങളില്‍ പോലും ഇത്തവണ എല്‍.ഡി.എഫ് നേട്ടമുണ്ടാക്കും. മാതൃകാ പെരുമാറ്റച്ചട്ടം ലംഘിച്ചെന്ന പരാമര്‍ശം അവര്‍ക്ക് ഒന്നും പറയാന്‍ ഇല്ലാത്തതിനാലാണ്. കൊവിഡ് ചികിത്സ സൗജന്യമായി നല്‍കിയതു കേരളം മാത്രമാണ്. സൗജന്യമായി കൊവിഡ് വാക്‌സിന്‍ നല്‍കുമെന്നു പറഞ്ഞതില്‍ യാതൊരു പെരുമാറ്റചട്ട ലംഘനവുമില്ല. തെരഞ്ഞെടുപ്പ് കഴിഞ്ഞാല്‍ യു.ഡി.എഫിന്റെ തകര്‍ച്ചയോടൊപ്പം മുസ്‌ലിം ലീഗിന്റെ അടിത്തറപോലും ഇല്ലാതാകും. നാലു വോട്ടിനു വേണ്ടിയാണ് ജമാത്തെ ഇസ്‌ലാമിയുമായി കോണ്‍ഗ്രസും ലീഗും കൂട്ടുകൂടുന്നതെന്നും മുഖ്യമന്ത്രി ആരോപിച്ചു.