റിയോ ഡി ജനീറോ: ഇന്ത്യന്‍ ഒളിംപിക് സംഘം റിയോയിലെ ഒളിംപിക് വില്ലേജുകളിലെത്തി തുടങ്ങി. കഴിഞ്ഞ ദിവസം ഹോക്കി സംഘം റിയോയിലെത്തിയിരുന്നു. വില്ലേജിലെ സജ്ജീകരണങ്ങളില്‍ ഇന്ത്യ സംതൃപ്തി അറിയിച്ചിട്ടുണ്ട്. ഓഗസ്റ്റ് രണ്ടിനാണ് ഇന്ത്യന്‍ ടീമിനെ ഔദ്യോഗികമായി സ്വാഗതം ചെയ്യുന്ന ചടങ്ങ് നടക്കുക. ഇതിനായി ഇന്ത്യക്ക് പ്രത്യേക ഇടം നല്‍കിയിട്ടുണ്ട്. ചടങ്ങില്‍ ഇന്ത്യന്‍ പതാക പ്രദര്‍ശിപ്പിക്കുകയും ദേശീയ ഗാനമാലപിക്കുകയും ചെയ്യും.

ടീമംഗങ്ങള്‍ പരസ്പരം പരിചയപ്പെടാന്‍ പ്രത്യേക സമയവും അനുവദിച്ചിട്ടുണ്ട്. റിയോയിലെ ബാര മലനിരകളിലാണ് ഒളിംപിക് വില്ലേജ് ഒരുക്കിയിരിക്കുന്നത്. ഇന്ത്യന്‍ ഭക്ഷണങ്ങളും ഇവിടെ ഒരുക്കിയിട്ടുണ്ട്. വില്ലേജിലെ താരങ്ങള്‍ക്കായി ജിം, വിര്‍ച്വല്‍ റിയാലിറ്റി സെന്ററുകള്‍, വില്ലേജ് പ്ലാസ എന്നിവ ഇതിനകത്ത് ഒരുക്കിയിട്ടുണ്ട്.