തൊടുപുഴ: ഗോവധ നിരോധനത്തിനായി പുതിയ ഉത്തരവിറക്കിയ പ്രധാനമന്ത്രി നരേന്ദ്ര മോദി ഹിറ്റ്‌ലറുടെ നയം നടപ്പാക്കാനാണ് ശ്രമിക്കുന്നതെന്നും ജനാധിപത്യ രാജ്യത്ത് ഇത്തരം നീക്കങ്ങള്‍ വിലപ്പോകില്ലെന്നും ഇതിനെതിരെ ശക്തമായി പ്രതികരിക്കാന്‍ പൊതുസമൂഹം മുന്നോട്ട് വരണമെന്നും മുസ്‌ലിം ലീഗ് സംസ്ഥാന സെക്രട്ടറി ടി.എം സലീം , ജില്ലാ പ്രസിഡന്റ് കെ.എം.എ ഷുക്കൂര്‍ , ജന. സെക്രട്ടറി എം.എസ്. മുഹമ്മദ് ട്രഷറര്‍ ഫൈസല്‍ കമാല്‍ എന്നിവര്‍ സംയുക്ത പ്രസ്താവനയില്‍ ആവശ്യപ്പെട്ടു.
ഏതുതരം ഭക്ഷണം കഴിക്കണമെന്ന് തീരുമാനിക്കാനുള്ള മൗലീകാവകാശം രാജ്യത്തെ പൗരന്മാര്‍ക്കുണ്ടെന്നും ഇതിനെ ചോദ്യം ചെയ്യാന്‍ ഒരു ഭരണാധികാരിക്കും അവകാശമില്ലെന്നും നേതാക്കള്‍ പറഞ്ഞു.
രാജ്യത്ത് ആര്‍.എസ്.എസിന്റെ തീരുമാനങ്ങള്‍ നടപ്പാക്കാനാണ് മോദി ശ്രമിക്കുന്നതെന്നും ഇത് രാജ്യത്ത് വലിയ വിപത്ത് സൃഷ്ടിക്കുമെന്നും നേതാക്കള്‍ പറഞ്ഞു.