തൃശൂര്‍: തദ്ദേശ സ്ഥാപനങ്ങളിലേക്ക് നടന്ന തെരഞ്ഞെടുപ്പില്‍ തൃശൂര്‍ ജില്ലയില്‍ ഇടതുമുന്നണിക്ക് നേട്ടം. ഏറെ കോളിളക്കം സൃഷ്ടിച്ച വടക്കാഞ്ചേരിയിലെ ലൈഫ് മിഷന്‍ പദ്ധതി വിവാദം യു.ഡി.എഫിനെ പിന്തുണച്ചില്ല. വടക്കാഞ്ചേരി നഗരസഭയില്‍ തന്നെ 21 ഡിവിഷനുകളില്‍ എല്‍.ഡി.എഫ് മുന്നേറ്റമാണുണ്ടായത്. യു.ഡി.എഫിന് 16 സീറ്റുകളേ നേടാനായുള്ളൂ.
ജില്ലാ പഞ്ചായത്തില്‍ ആകെയുള്ള 29 സീറ്റില്‍ 24 സീറ്റും നേടി എല്‍.ഡി.എഫ് ഭരണത്തുടര്‍ച്ച നേടി. 16 ബ്ലോക്ക് പഞ്ചായത്തുകളില്‍ രണ്ടെണ്ണം മാത്രമാണ് യു.ഡി.എഫിനു നേടാനായത്. 14 സീറ്റുകളും എല്‍.ഡി.എഫിനൊപ്പം നിന്നു. 86 ഗ്രാമപഞ്ചായത്തുകളില്‍ 65 എണ്ണം എല്‍.ഡി.എഫും 20 എണ്ണം യു.ഡി.എഫും ഒരെണ്ണം എന്‍.ഡി.എയും നേടി. 2015ല്‍ 18 പഞ്ചായത്തുകളില്‍ യു.ഡി.എഫിന് ഭരണമുണ്ടായിരുന്നു.
ഏഴു മുനിസിപ്പാലിറ്റികളില്‍ അഞ്ചും എല്‍.ഡി.എഫിനൊപ്പം നിന്നു. രണ്ടു നഗരസഭകള്‍ യു.ഡി.എഫും നേടി. തൃശൂര്‍ കോര്‍പറേഷനില്‍ 55 സീറ്റില്‍ 24 സീറ്റുകള്‍ നേടി എല്‍.ഡി.എഫും 23 സീറ്റുകള്‍ നേടി യു.ഡി.എഫും ഇഞ്ചോടിഞ്ച് പോരാട്ടമാണ് നടന്നത്. ഒരു സീറ്റില്‍ വിജയിച്ച കോണ്‍ഗ്രസ് വിമതന്റെ പിന്തുണ കോര്‍പറേഷന്‍ ഭരണത്തില്‍ നിര്‍ണായകമാകും. ബി.ജെ.പിക്ക് ആറ് സീറ്റ് മാത്രമാണ് ലഭിച്ചത്. എന്‍.ഡി.എയുടെ മേയര്‍ സ്ഥാനാര്‍ഥിയായി മത്സരിച്ച ബി. ഗോപാലകൃഷ്ണന്‍ കുട്ടന്‍കുളങ്ങര സീറ്റില്‍ 241 വോട്ടുകള്‍ക്ക് പരാജയപ്പെട്ടു.