തിരുവനന്തപുരം: കെ.സുധാകരനെ കെ.പി.സി.സി പ്രസിഡന്റ് ആക്കണമെന്ന് ആവശ്യപ്പെട്ട് ഫ്‌ളക്‌സ് ബോര്‍ഡുകള്‍. തിരുവനന്തപുരം എം.എല്‍.എ ഹോസ്റ്റലിന് മുന്നിലും തിരുവനന്തപുരം കെ.പി.സി.സി ഓഫിസിന് മുന്നിലുമാണ് ഫ്‌ളക്‌സുകള്‍ സ്ഥാപിച്ചിരിക്കുന്നത്.

ഇനിയൊരു പരീക്ഷണത്തിന് സമയമില്ലെന്നും യൂത്ത് കോണ്‍ഗ്രസിന്റെയും കെ.എസ്.യുവിന്റെയും പേരില്‍ സ്ഥാപിച്ചിരിക്കുന്ന പോസ്റ്ററില്‍ പറയുന്നു.

'ഇനിയും ഒരു പരീക്ഷണത്തിന് സമയം ഇല്ല. കെ സുധാകരനെ വിളിക്കൂ കോണ്‍ഗ്രസിനെ രക്ഷിക്കൂ. കേരളത്തിലെ കോണ്‍ഗ്രസിന് ഊര്‍ജ്ജം പകരാന്‍ ഊര്‍ജ്ജസ്വലതയുള്ള നേതാവ് കെ.സുധാകരനെ കെ.പി.സി.സി പ്രസിഡന്റ് ആക്കുക' എന്നിങ്ങനെയാണ് ഫ്‌ളക്‌സ് ബോര്‍ഡുകളില്‍ എഴുതിയിരിക്കുന്നത്.

ഇന്ന് യു.ഡി.എഫ് നേതൃയോഗം ചേരാനിരിക്കുന്നതിനിടെയാണ് കെ.സുധാകരനെ പ്രസിഡന്റ് ആക്കണമെന്ന് ആവശ്യപ്പെട്ടുള്ള ഫ്ളക്സ് ഉയര്‍ന്നത് എന്നത് നിര്‍ണായകമാണ്.

താനായിരുന്നു കോണ്‍ഗ്രസ് പ്രസിഡന്റെങ്കില്‍ തദ്ദേശതെരഞ്ഞെടുപ്പ് ഫലം ഇതാകില്ലായിരുന്നുവെന്ന് കഴിഞ്ഞ ദിവസം കെ.സുധാകരന്‍ എം.പി പറഞ്ഞിരുന്നു.