ദുബൈ: ഇന്ത്യന്‍ ക്രിക്കറ്റ് ഇതിഹാസം സച്ചിന്‍ ടെണ്ടുല്‍ക്കറിന് അന്താരാഷ്ട്ര ക്രിക്കറ്റ് കൗണ്‍സിലിന്റെ ബഹുമതി. അന്താരാഷ്ട്ര ക്രിക്കറ്റ് കൗണ്‍സിലിന്റെ ഹാള്‍ ഓഫ് ഫെയിം നല്‍കിയാണ് സച്ചിനെ ആദരിച്ചത്. സച്ചിനെ കൂടാതെ മുന്‍ ദക്ഷിണാഫ്രിക്കന്‍ താരം അലന്‍ ഡൊണാള്‍ഡ്, ര@ണ്ടു തവണ വനിതാ ലോകകപ്പ് നേടിയ ആസ്‌ത്രേലിയന്‍ ടീമില്‍ അംഗമായിരുന്ന കാതറിന്‍ ഫിറ്റ്‌സ്പാട്രിക്ക് എന്നിവര്‍ക്കും ഹാള്‍ ഓഫ് ഫെയിം ബഹുമതി നല്‍കി ആദരിച്ചിട്ടുണ്ട്.
ലോകക്രിക്കറ്റിന് നല്‍കുന്ന സംഭാവനകള്‍ പരിഗണിച്ച് 2009 ജനുവരിയിലാണ് ഐ.സി.സി ഹാള്‍ ഓഫ് ഫെയിം ഏര്‍പ്പെടുത്തിയത്. ഐ.സി.സി ഹാള്‍ ഓഫ് ഫെയിമില്‍ ഇതോടെ ആറ് ഇന്ത്യക്കാര്‍ ഇടംപിടിച്ചു. നേരത്തെ രാഹുല്‍ ദ്രാവിഡ്, അനില്‍ കുംബ്ലെ, കപില്‍ ദേവ്, ബിഷന്‍ സിങ് ബേദി, സുനില്‍ ഗാവസ്‌കര്‍ എന്നിവരും ഐ.സി.സി ഹാള്‍ ഓഫ് ഫെയിമില്‍ ഇടംപിടിച്ചിരുന്നു.