പനജി: ഐ.എസ്.എല്ലില്‍ കേരളാ ബ്ലാസ്റ്റേഴ്‌സിന് ജയമില്ല. ഇന്നലെ ഈസ്റ്റ് ബംഗാളിനെതിരേയുള്ള മത്സരം സമനിലയില്‍ കലാശിച്ചു. മത്സരത്തിന്റെ തുടക്കം മുതല്‍ ഇരു ടീമുകളും അക്രമിച്ച് കളിച്ചെങ്കിലും 13 മിനുട്ടില്‍ സെല്‍ഫ് ഗോള്‍ പിറന്നതോടെ ബ്ലാസ്റ്റേഴ്‌സിന് തിരിച്ചടിയായി. പിന്നീട് സമനില ഗോളിനായി ബ്ലാസ്റ്റേഴ്‌സ് ഉണര്‍ന്ന് കളിച്ചെങ്കിലും ആദ്യ പകുതിയില്‍ ഈസ്റ്റ് ബംഗാള്‍ ഒരു ഗോളിന് മുന്നിട്ട് നിന്നു. രണ്ടാം പകുതിക്ക് ശേഷം ശകത്മായ നീക്കങ്ങളുമായി കളംനിറഞ്ഞ് കളിച്ച ബ്ലാസ്റ്റേഴ്‌സ് ഈസ്റ്റ് ബംഗാളിനെ സമ്മര്‍ദത്തിലാക്കി. ഒടുവില്‍ രണ്ടാം പകുതിയുടെ അവസാന മിനുട്ടില്‍ കേരളാ ബ്ലാസ്റ്റേഴ്‌സ് സമനില കണ്ടെത്തി തോല്‍വി ഒഴിവാക്കി. സഹലിന്റെ പാസില്‍ നിന്ന് ജീക്ക്‌സണ്‍ സിങ്ങാണ് ബ്ലാസ്റ്റേഴ്‌സിന്റെ സമനില ഗോള്‍ കണ്ടെത്തിയത്. 64 ശതമാനം പന്ത് കൈവശം വെച്ച് കളിച്ചിട്ടും ബ്ലാസ്റ്റേഴ്‌സിന് ജയം സ്വന്തമാക്കാന്‍ കഴിഞ്ഞില്ല. ഇന്നലെ നടന്ന മറ്റൊരു മത്സരത്തില്‍ എതിരില്ലാത്ത രണ്ട് ഗോളിന് മുംബൈ സിറ്റി ഹൈദരാബാദ് എഫ്.സിയെ പരാജയപ്പെടുത്തി. വിഗ്നേഷ് (38), ആദം ലെ ഫോന്ദ്രെ (59) എന്നിവര്‍ മുംബൈ സിറ്റിക്ക് വേണ്ടി ഗോളുകള്‍ സ്വന്തമാക്കി. ഇന്ന് വൈകീട്ട് നടക്കുന്ന മത്സരത്തില്‍ എ.ടി.കെമോഹന്‍ ബഗാന്‍ ബംഗളൂരു എഫ്.സിയെ നേരിടും.