കെയ്‌റോ: സെനഗലിനെ ഒരു ഗോളിന് കീഴടക്കി ആഫ്രിക്കന്‍ നാഷന്‍സ് കപ്പ് അള്‍ജീരിയ സ്വന്തമാക്കി. കഴിഞ്ഞ ദിവസം നടന്ന ഫൈനലിലായിരുന്നു അള്‍ജീരിയയുടെ കിരീട ധാരണം. രണ്ടാം മിനുട്ടില്‍ ബാഗ്ദാദ് നേടിയ ഗോളിലായിരുന്നു അള്‍ജീരിയ കിരീടം സ്വന്തമാക്കിയത്.
സമനില ഗോളിനുവേ@ണ്ടി സെനഗല്‍ കിണഞ്ഞു ശ്രമിച്ചെങ്കിലും അള്‍ജീരിയന്‍ പ്രതിരോധത്തെ ഭേദിക്കാനായില്ല. 1990ന് ശേഷം ഇത് രണ്ട@ാം തവണയാണ് അള്‍ജീരിയ ആഫ്രിക്കന്‍ ചാംപ്യന്‍മാരാകുന്നത്. മത്സരത്തിന്റെ രണ്ട@ാം പകുതിയില്‍ റഫറി സെനഗലിന് അനുകൂലമായി പെനാല്‍റ്റി വിധിച്ചെങ്കിലും വാര്‍ അള്‍ജീരിയക്ക് അനുകൂലമായി.
ഇസ്മായില സാറിന്റെ ഷോട്ട് ബോക്‌സിനുള്ളില്‍ തടയുന്നതിനിടെ അദ്‌ലെനെ ഗ്വെദെയ്‌റയുടെ കൈയില്‍ തട്ടിയതിനാണ് റഫറി പെനാല്‍റ്റി സ്‌പോട്ടിലേക്ക് വിരല്‍ ചൂണ്ടിയതെങ്കിലും വിഡിയോയില്‍ റഫറിയുടെ തീരുമാനം തെറ്റാണെന്ന് തെളിഞ്ഞു. തുടക്കത്തില്‍തന്നെ ഗോള്‍ നേടിയതോടെ കടുത്ത പ്രതിരോധത്തിലൂന്നിയാണ് അള്‍ജീരിയ കളിച്ചത്. സെനഗല്‍ 63 ശതമാനം പന്ത് കൈവശംവയ്ക്കുകയും 12 തവണ ഗോള്‍മുഖത്തേക്ക് ഷോട്ടുകള്‍ ഉതിര്‍ക്കുകയും ചെയ്തപ്പോള്‍ ഒരുതവണ മാത്രമാണ് അള്‍ജീരിയ ഷോട്ടുതിര്‍ത്തത്. അത് ഗോളില്‍ കലാശിക്കുകയും ചെയ്തു.
അള്‍ജീരിയന്‍ താരം ബാഗ്ദാദ് പോസ്റ്റിലേക്ക് അടിച്ച പന്ത് സെനഗല്‍ താരത്തിന്റെ കാലില്‍ തട്ടി റിഫ്‌ളക്ട് ചെയ്തായിരുന്നു ഗോള്‍ വലയില്‍ പ്രവേശിച്ചത്. മാഞ്ചസ്റ്റര്‍ സിറ്റി താരവും അള്‍ജീരിയന്‍ ക്യാപ്റ്റനുമായ റിയാദ് മെഹ്‌റസിന്റെ ആദ്യ അന്താരാഷ്ട്ര കിരീടം കൂടിയാണിത്. അല്‍ ഹാജ് ദിയൂഫിന് ശേഷം കിരീടം തേടിയിറങ്ങിയ സെനഗല്‍ വീണ്ടും ആഫ്രിക്കന്‍ ചാംപ്യന്‍മാരാകാമെന്ന മോഹം ബാക്കിയാക്കി മടങ്ങി. ചാംപ്യന്‍സ് ലീഗിന് ശേഷം ആഫ്രിക്കന്‍ നാഷന്‍സ് കപ്പെന്ന മോഹം പൂര്‍ത്തീകരിക്കാന്‍ ലിവര്‍പൂള്‍ താരം സാദിയോ മാനേക്കും കഴിഞ്ഞില്ല.