തലശ്ശേരി: അനധികൃതമായി കടത്തുകയായിരുന്ന മണലും ലോറിയും പൊലിസ് പിടികൂടി. തലശ്ശേരി രണ്ടാം റെയില്‍വെ ഗേറ്റ് പരിസരത്തും തലായ് ചക്യത്ത്മുക്കില്‍ നിന്നുമായാണ് ട്രാഫിക് എസ്.ഐ വി.വി ശ്രീജിത്തും സംഘവും ലോറികള്‍ പിടൂകൂടിയത്. ലോറികളിലെ ഡ്രൈവര്‍മാരെ പൊലിസ് കസ്റ്റഡിയിലെടുത്തു.
ഡ്രൈവര്‍മാരായ കുടക് സ്വദേശി അഷറഫ്(36), മംഗലാപുരം സ്വദേശി അബ്ദുള്‍ മജിദ്(34) എന്നിവരെയാണ് പിടികൂടിയത്. മണലുമായി മംഗലാപുരത്തുനിന്ന് പള്ളൂരിലേക്ക് പോവുകയായിരുന്ന ലോറിയും മംഗലാപുരത്തു നിന്ന് മാഹിയിലേക്ക് പോവുകയായിരുന്ന ലോറിയുമാണ് പിടികൂടിയത്. മതിയായ രേഖകളൊന്നുമില്ലാതെയാണ് മണല്‍ കടത്തുന്നതെന്ന് പൊലിസ് പറഞ്ഞു. മംഗലാപുരം സ്വദേശി ഷാഹിദ് ജസ്‌വീറിന്റെയും സുരത്ത്കല്‍ സ്വദേശി യു. എം അബ്ദുള്‍ റഹീമിന്റെയും ഉടമസ്ഥതയിലുള്ളതാണ് മണല്‍ കടത്തുകയായിരുന്ന ലോറികള്‍. മംഗലാപുരത്തുനിന്നു ഉദ്യോഗസ്ഥര്‍ക്ക് വന്‍തുക കൈക്കൂലി നല്‍കിയാണ് ഇത്തരത്തില്‍ മണല്‍ കടത്തുന്നതെന്ന് വ്യാപകമായ പരാതി ഉയര്‍ന്നിട്ടുണ്ട്.