കഴക്കൂട്ടം: കാര്യവട്ടത്തെ പ്രമുഖ വിദ്യാഭ്യാസ സ്ഥാപനത്തില്‍ പഠിക്കുന്ന സൗത്ത് ആഫ്രിക്കന്‍ വംശജയായ വിദ്യാര്‍ഥിനിയെ മാനഭംഗപ്പെടുത്തിയ കേസിലെ പ്രതിയെ കഴക്കൂട്ടം പൊലിസ് അറസ്റ്റുചെയ്തു. പാങ്ങപ്പാറ അംബേദ്ക്കര്‍ പുരത്തില്‍ ലക്ഷം വീട് കോളനിയില്‍ അനു ഭവനില്‍ അനുവിനെയാണ് പൊലിസ് അറസ്റ്റ് ചെയ്തത്.
ഇക്കഴിഞ്ഞ 30ന് വൈകിട്ട് മൂന്നുമണിയോടെ ക്ലാസ് കഴിഞ്ഞ് കാര്യവട്ടം എല്‍.എന്‍.സി.പി.ഇ റോഡിലൂടെ നടന്ന് പോകവേയാണ് ബൈക്കിലെത്തിയ പ്രതി യുവതിയെ കടന്ന് പിടിക്കുകയായിരുന്നുവെന്ന് പൊലിസ് പറഞ്ഞു. അന്ന് തന്നെ വിദേശ യുവതി കഴക്കൂട്ടം പൊലിസ് സ്റ്റേഷനില്‍ നേരിട്ടെത്തി പരാതിപ്പെടുകയായിരുന്നു.
യുവതി നല്‍കിയ വിവരമനുസരിച്ച് ബൈക്കിന്റെ നമ്പര്‍ വച്ചാണ് പ്രതിയെ പിടികൂടിയത്. വിദ്യാര്‍ഥിനി പ്രതിയെ കണ്ട് തിരിച്ചറിഞ്ഞിട്ടുണ്ട്. പൊലിസ് അനുവിനെ കൂടുതല്‍ ചോദ്യം ചെയ്തതപ്പോള്‍ ഇതിന് മുമ്പും ടെക്‌നോപാര്‍ക്ക്, തൃപ്പാദപുരം, കല്ലിങ്ങല്‍, തുടങ്ങിയ സ്ഥലങ്ങളിലെ ഇട റോഡികളില്‍ വച്ച് ഇത്തരത്തില്‍ ടെക്കികളായ പെണ്‍കുട്ടികളെ ശല്യം ചെയ്തിട്ടുള്ളതായി പ്രതി പൊലിസിനോട് വെളിപ്പെടുത്തിയിട്ടുണ്ട്.
കഴകൂട്ടം സൈബര്‍ സിറ്റി പൊലിസ് അസിസ്റ്റന്റ് കമ്മിഷണര്‍ അനില്‍കുമാറിന്റെ നിര്‍ദേശാനുസരണം കഴകൂട്ടം പൊലിസ് സ്റ്റേഷന്‍ എസ്.എച്ച്.ഒ എസ്.വൈ സുരേഷും എസ്.ഐ സുധീഷ് കുമാറും ചേര്‍ന്നാണ് പ്രതിയെ അറസ്റ്റ് ചെയ്തത്. വനിതാ എസ്.ഐ ഷൈല, എ.എസ്.ഐ ജസ്റ്റിന്‍ മോസസ് എന്നിവര്‍ അന്വേഷണ സംഘത്തില്‍ ഉണ്ടായിരുന്നു.