ഉപ്പള: മംഗല്‍പ്പാടി പഞ്ചായത്ത് ഭരണസമിതിയിലേക്കുള്ള അംഗങ്ങളുടെ സത്യപ്രതിജ്ഞയ്ക്കിടെ ജയ് ശ്രീറാം വിളിച്ചത് ഒച്ചപ്പാടിനിടയാക്കി. ജയ്ശ്രീറാം വിളിച്ച നടപടി ഭരണഘടനയോടുള്ള അനാദരവും മത സൗഹാര്‍ദത്തിന് കോട്ടം സംഭവിക്കുന്നതാണെന്നും ഇത്തരം നടപടികള്‍ ആവര്‍ത്തിക്കാതിരിക്കാന്‍ നടപടി സ്വീകരിക്കണമെന്നുമാവശ്യപ്പെട്ട് മുസ്‌ലിം ലീഗ് മംഗല്‍പാടി പഞ്ചായത്ത് കമ്മിറ്റി വരണാധികാരിക്ക് പരാതി നല്‍കി. പതിനേഴാം വാര്‍ഡ് അടുക്കയിലെ ബി.ജെ.പി അംഗം കിഷോര്‍ കുമാറാണ് സത്യപ്രതിജ്ഞ ചടങ്ങിനിടെ സദസിനെ സാക്ഷി നിര്‍ത്തി ഉച്ചത്തില്‍ ജയ്ശ്രീറാം വിളി മുഴക്കിയത്.
ഉടനെ സദസില്‍ നിന്നും മുസ്‌ലിം ലീഗ് പ്രവര്‍ത്തകര്‍ ബഹളം വെച്ചു. ചടങ്ങ് അലങ്കോലപ്പെടുത്താന്‍ ശ്രമിച്ച സംഘപരിവാര്‍ സംഘത്തിന്റെ ശ്രമത്തിനെതിരേ വ്യാപക പ്രതിഷേധം ഉയര്‍ന്നു.